Kamati ya Ulinzi na usalama (W) Singida yakagua miradi ya P4R

Posted on: April 5th, 2018

Kamati ya ulinzi na usalama ya Wilaya ya Singida ikiongozwa na mwenyekiti wake, mkuu wa Wilaya ya Singida, Mhe. Elias Tarimo leo imefanya ziara ya kukagua miradi ya maendeleo inayotekelezwa katika shule za msingi na sekondari za Halmashauri ya Wilaya ya Singida.

Ziara hiyo ilifanyika kwa kutembelea Shule ya Sekondari Ilongero, Shule ya Sekondari Mtinko, Shule ya Msingi Mtinko, Shule ya Msingi Mwakichenche pamoja na Shule ya Msingi Ikhumese.

Mhe. Mkuu wa Wilaya ameisifu Halmashauri ya wilaya ya Singida kwa kutekeleza miradi hiyo kwa ubora wa hali ya juu huku ikitumia gharama ndogo kwa utaratibu wa "Force Account" badala ya utaratibu wa kutumia wakandarasi ambao ulikuwa ukipelekea miradi kugharimu fedha nyingi na wakati mwingine kushindwa kukamilika.

Katika hatua nyingine Mhe. Mkuu wa Wilaya amaishukuru Serikali ya awamu ya tano chini ya Mhe. Rais John Pombe Magufuli kwa kupeleka fedha zinazowezesha miradi hiyo kutekelezwa kwa ufanisi mkubwa.

Katika ziara hiyo pia walishiriki Mkurugenzi Mtendaji wa Halmashauri ya Wilaya ya Singida Bw. Rashid Mandoa akiongozana na baadhi ya wakuu wa Idara, Mwenyekiti wa Halmashauri ya Wilaya ya Singida Mhe. Elia Digha pamoja na viongozi wengne wa Chama tawala (CCM) na Serikali.