CAMFED WATAMBULISHA MRADI WA STADI ZA MAISHA

Posted on: May 21st, 2024

SHIRIKA lisilo la kiserikali la CAMFED Tanzania kwa kushirikiana na Wizara ya Elimu na OR-Tamisemi linafanya semina ya siku mbili kwa Maafisa Elimu Kata , Wakuu  wa Shule na Walimu wa Unasihi lengo ikiwa ni kuwajengea uwezo katika kutoa elimu na mwongozo juu ya stadi za maisha, kwa wanafunzi wa Shule za Sekondari ndani ya Halmashauri ya Wilaya ya Singida.

Akizungumza wakati wa Ufunguzi wa Semina hiyo  Kaimu Mkurugenzi wa Halmashauri ya Wilaya ya Singida Ndg Christopher Kidubo amewashukuru wadau wa CAMFED kwa kushirikiana na Serikali katika kukabiliana na jukumu kubwa la Malezi ya Vijana na amehimiza Washiriki wote kuwa wasikivu wakati watakapokuwa wakijengewa uwezo na Wawezeshaji kutoka CAMFED ili wakatumie elimu hiyo kuwawezesha  Wanafunzi kujisaidia kujitambua, wao ni nani na wanatakiwa kufanya nini, ili kuweza kufikia malengo yao waliojiwekea.

Awali wakati akimkaribisha  mgeni rasmi Kiongozi wa Timu ya Wawezeshaji  Ndg Musa Mnyeti ambaye ni afisa anayeshughulikia Elimu Sekondari kutoka Wizara ya Elimu amesema wapo Halmashauri ya Wilaya ya Singida ili kuwajengea Uwezo Maafisa Elimu Kata,Wakuu wa Shule na Walimu wa Ushauri/Unasihi juu ya  stadi za Maisha ili wakawawezeshe Wanafunzi wa Shule za Sekondari wanaowafundisha.

Mpaka sasa Shirika la CAMFED  limefanikiwa kuwafikia zaidi ya  wanafunzi laki mbili na ishirini na sita elfu kwa kuwawezesha kujitambua na kukabiliana na Changamoto mbalimbali zinazowakabili ambapo imepelekea kupunguza mdondoko wa wanafunzi kwenye shule za sekondari.