CWT SINGIDA VIJIJINI YAANDAA MKUTANO MKUU KUJADILI MUSTAKABALI WA WALIMU

Posted on: March 22nd, 2025

Chama cha Walimu Tanzania (CWT) tawi la Singida Vijijini limefanya mkutano wake mkuu katika ukumbi wa Lulumba, ukihusisha walimu wote wa shule za msingi na sekondari kutoka Halmashauri ya Wilaya ya Singida. Mkutano huo ulikuwa na lengo la kujadili ripoti ya utendaji wa chama kwa kipindi cha miaka mitano na kupokea mapendekezo ya maboresho ili kuimarisha ustawi wa walimu pamoja na kufanya uchaguzi wa viongozi wapya wa CWT katika ngazi mbali mbali za Wilaya.

Akizungumza katika mkutano huo, Mkuu wa Wilaya ya Singida, Mhe. Godwin Gondwe, aliyekuwa mgeni rasmi, aliwapongeza walimu kwa mshikamano wao na kupongeza uongozi wa CWT kwa usimamizi mzuri wa chama. Pia alitambua jitihada zao katika kutetea maslahi ya walimu na kuboresha mazingira ya kazi.

“Kwanza nipongeze uongozi wa CWT tawi la Singida Vijijini kwa kusamia vizuri chama chetu na ni chama tulivu, mna viongozi wazuri, wema, wachapa kazi na kubwa zaidi wenye hekima ya uongozi na ukiona viongozi wana hekima ujue wajumbe wamefanya kazi nzuri.”

Mkutano huu ulitoa fursa kwa walimu kushiriki mijadala yenye lengo la kuimarisha utendaji wa chama na kuboresha sekta ya elimu katika wilaya.