DC GONDWE AFANYA ZIARA YA UTATUZI WA MGOGORO WA ARDHI.

Posted on: December 24th, 2025

Mwenyekiti wa Kamati ya Ulinzi na Usalama ya Wilaya, ambaye pia ndiye Mkuu wa Wilaya ya singida, Mhe. Godwin Gondwe,  amefanya ziara katika Kata ya Ilongero, kwa lengo la utatuzi wa mgogoro wa ardhi baina ya kijiji cha Madamigha kilichopo katika Kata ya Ilongero na kijiji cha Ifombou kilichopo katika Kata ya Ntonge leo tarehe 24/12/2025.

Katika ziara hiyo, Mhe. Gondwe ameambatana na Kamati ya Ulinzi na Usalama ya Wilaya, Mwenyekiti wa Halmashauri, Mhe. Elia D. Mlangi,  Mkurugenzi Mtendaji wa Halmashauri ya Wilaya ya Singida,  Bi. Ester Chaula na wataalamu wa idara za ardhi na sheria wa Halmashauri pamoja na watendaji wa vijiji vyote viwili, ambapo kwa pamoja  wamepata nafasi ya kuwasikiliza wananchi wa maeneo hayo, wakitoa maelezo kuhusiana na mgogoro huo ambao chanzo kikubwa ni mipaka baina ya vijiji hivyo.

Baada ya kuwasikiliza wananchi Mhe.  Gondwe ametoa maagizo kwa maafisa ardhi wa Halmashauri pamoja na Viongozi wa Serikali ya vijiji vyote viwili, kupita na kupima  ukubwa wa eneo na kutambua eneo la mpaka wenye mgogoro, ikiwa ni hatua ya kwanza ya utatuzi wa mgogoro huo na baada ya hapo taarifa itapelekwa katika Ofisi ya Mkuu wa Wilaya kwa utatuzi zaidi. Vilevile,  Mhe. Gondwe amesisitiza kuwa, utatuzi wa mgogoro huo, utakuwa ni shirikishi baina ya watendaji na viongozi wa serikali ya vijiji vyote viwili,  kwa lengo la kumaliza mgogoro kwa maridhiano.