HALMASHAURI YA WILAYA YA SINGIDA YAFANYA TATHMINI YA MAOMBI YA MIKOPO YA ASILIMIA 10, KWA VIKUNDI VYA WANAWAKE, VIJANA NA WATU WENYE ULEMAVU.

Posted on: January 27th, 2026

Timu ya wataalamu wa maendeleo ya jamii kutoka katika Halmashauri ya Wilaya ya Singida imefanya ziara ya tathmini na uchambuzi wa maombi ya mikopo ya Asilimia 10, kwa vikundi vya wanawake, vijana na watu wenye ulemavu katika kata mbalimbali za Halmashauri. Ziara hiyo imefanyika kuanzia Tarehe 21 hadi 26 Januari, 2026 ikihusisha kata za Ngimu, Msange, Munghamo, Mughunga, Mgori, Ikhanoda, Mwasauya na Maghojoa, ikiwa na lengo la kukagua na kufanya tathmini ya taarifa za waombaji wa mikopo ili kuhakikisha wanakidhi vigezo vilivyowekwa.

Katika ziara hiyo, timu ya wataalamu ilijikita katika uhakiki wa nyaraka na viambatanisho muhimu vinavyohitajika wakati wa kuomba mikopo, pamoja na kuchunguza aina ya shughuli za kiuchumi zinazofanywa na vikundi husika. Hatua hiyo imelenga kubaini uhalali wa maombi na kuhakikisha kuwa mikopo hiyo inawanufaisha walengwa waliokusudiwa.

Aidha, tathmini hiyo imefanyika ili kuhakikisha kuwa mikopo inayotolewa inachangia katika kukuza uchumi wa vikundi vya wanawake, vijana na watu wenye ulemavu, sambamba na kuongeza uwajibikaji wa matumizi sahihi ya fedha zitakazotolewa. Wataalamu wameendelea kusisitiza umuhimu wa vikundi kuzingatia taratibu na masharti ya mikopo ili kufanikisha dhamira ya Serikali ya kuwezesha makundi maalum kiuchumi na kijamii.