KIKOSI KAZI CHA SAMIA CHATATUA KERO 952 WILAYA YA SINGIDA

Posted on: February 11th, 2026

Mkuu wa Wilaya ya Singida, Mhe. Godwin Gondwe, amerudisha tabasamu na kuamsha nguvu mpya kwa wananchi wa wilaya hiyo baada ya Kikosi Kazi cha Samia kufanikisha utatuzi wa kero zaidi ya 900 zilizokuwa zikiwakabili wakazi wa eneo hilo. Wananchi mbalimbali wamejitokeza hadharani kutoa ushuhuda wa namna changamoto zao zilivyopatiwa ufumbuzi, hatua iliyoongeza imani kwa uongozi wa serikali kuanzi ngazi ya chini mpaka ile ya taifa.

Akizungumza leo, Februari 11, 2026 katika siku maalum ya tathmini ya usikilizaji na utatuzi wa kero za wananchi wa Wilaya ya Singida, Mhe. Gondwe alisema zoezi hilo limekuwa na mafanikio makubwa tangu kuanzishwa kwake. Alieleza kuwa lengo kuu ni kuhakikisha kila mwananchi anasikilizwa na changamoto zake zinapatiwa ufumbuzi kwa wakati ili kuimarisha ustawi wa jamii.DC Gondwe, amesema Kikosi Kazi cha Samia kimesikiliza jumla ya kero 973, ambapo kati ya hizo, kero 952 zimefungwa rasmi baada ya kupatiwa ufumbuzi. Alifafanua kuwa miongoni mwa kero hizo, zaidi ya 300 zilikuwa kubwa na nzito, zikiwemo zilizohitaji ushauri wa kisheria na maamuzi ya kina, lakini zilishughulikiwa kwa umakini na weledi mkubwa. Alibainisha kuwa migogoro ya ardhi na masuala ya mikopo ndiyo yaliyoongoza kwa wingi wa malalamiko kutoka kwa wananchi. Kutokana na hali hiyo, aliwahimiza wananchi kufuata taratibu za kisheria katika umiliki wa ardhi na mikataba ya kifedha, huku akisisitiza umuhimu wa elimu ya mara kwa mara ili kuzuia kujirudia kwa changamoto hizo.

Mhe. Gondwe alisema mafanikio hayo yanatokana na maelekezo ya Rais wa Jamhuri ya Muungano wa Tanzania, Dkt. Samia Suluhu Hassan, ambaye amesisitiza kusikilizwa na kutatuliwa kwa kero za wananchi ili waishi kwa amani na kuendelea na shughuli zao za maendeleo. Alieleza kuwa dhamira ya Rais ni kuona huduma za serikali zinawafikia wananchi kwa ufanisi na haki.