MAADHIMISHO YA JUMA LA ELIMU YA WATU WAZIMA YAFANYIKA KATA YA MERYA

Posted on: September 20th, 2024

Maadhimisho ya Juma la Elimu ya Watu Wazima ngazi ya Wilaya yamefanyika leo, tarehe 20 Septemba 2024, katika viwanja vya Shule ya Sekondari Merya, iliyopo Kata ya Merya, Halmashauri ya Wilaya ya Singida yakiongozwa na kauli mbiu “Ujumuishi katika elimu bila ukomo kwa ujuzi, kwa ustawi, amani na maendeleo”. Sherehe hizo zilihudhuriwa na viongozi mbalimbali wa serikali, wananchi, na washiriki wa programu za elimu ya watu wazima, huku mgeni rasmi akiwa ni Mwenyekiti wa Halmashauri ya Wilaya ya Singida, Mhe. Elia Digha.

Maadhimisho hayo yamejumuisha burudani na maonesho ya vipaji, ambapo wanafunzi walionyesha umahiri wao kwa kucheza na kuimba mashairi, wakisisitiza umuhimu wa elimu katika kuboresha maisha.

Akizungumza katika maadhimisho hayo, Afisa Elimu ya Watu wazima na Elimu nje ya Mfumo Rasmi Bw. Juma Sabigoro, ameeleza umuhimu wa elimu ya watu wazima katika jamii ambapo inasaidia kuwezesha watu kupata ujuzi juu ya matatizo mbali mbali ili waweze kupambana na mazingira yanayo wakabili katika maisha yao.

“Elimu ya watu wazima ni tendo la kupata na kutumia ujuzi, maarifa na mwelekeo inayoweza kukuwezesha wewe kuishi katika jamii. Inakuwezesha wewe kujitambua na kuweza kukabiliana na mazingira unayo yaishi kwa namna yoyote, kwa hiyo elimu hii inakwenda na mabadiliko ya sayansi na teknolojia. Tunaposema ni chombo cha ukombozi, ni chombo ambacho hutusaidia katika kutatua matatizo mbali mbali ili tuweze kupambana na mazingira yetu vizuri ipasavyo.” Alisema Bw. Sabigoro

Naye mgeni rasmi Mwenyekiti wa Halmashauri Mhe. Elia Digha, aliwapongeza washiriki kwa juhudi zao na kusisitiza umuhimu wa elimu kama nyenzo ya kuondokana na umasikini na kuboresha maisha ya jamii. Pia alihimiza wananchi kutumia fursa zilizopo za elimu bila kujali umri, kwa kuwa kujifunza ni hatua muhimu katika kujiletea maendeleo.

“Dunia hii huwezi kuishi vizuri, huwezi kulala vizuri, huwezi kufanya jambo lolote kama elimu huna. Elimu inamkomboa mtu katika jambo lolote hivyo wazazi hakikisheni watoto wanasoma na nyie wenyewe msome.” Alisema Mhe. Digha

Aidha, vikundi mbalimbali vilivyonufaika na elimu ya watu wazima vilishiriki katika hafla hiyo na kutoa ushuhuda wa jinsi elimu hiyo ilivyo wasaidia kuboresha hali zao za kiuchumi, kupanua ujuzi wao, na kujiongezea kipato huku wakitoa wito kwa wananchi wengine kujiunga na programu za elimu ya watu wazima.