KAMATI YA FEDHA,UONGOZI NA MIPANGO YAFANYA ZIARA KUKAGUA MIRADI YA MAENDELEO

Posted on: August 13th, 2024

Leo tarehe 13/08/2024 Kamati ya Fedha na Mipango ikiongozwa na Mwenyekiti wa Halmashauri ya Wilaya ya Singida Mhe Elia Digha imefanya ziara ya kukagua Miradi ya Maendeleo inayotekelezwa katika Kata ya Ilongero,Merya,Msange na Mrama.Mhe Digha alikuwa ameambatana na Makamu Mwenyekiti wa Halmashauri Mhe.Omary Mandi, Wajumbe wa Kamati hiyo Mhe. Iddi Kijida,Mhe Issa Mwiru,Mhe Hadija Kisuda, Mhe. Christina Jambi na Mhe.Paulo Himida

Katika Kata ya Msange na Ilongero Waheshimiwa Madiwani wamesomewa taarifa na kujionea maendeleo ya mradi wa kichomea taka,shimo la kondo la nyuma na Shimo la majivu katika Zahanati ya Sefunga Mangida na Kituo Cha Afya Ilongero ambapo kila moja umetekelezwa kwa gharama ya shilingi milioni 17.7 kila mmoja kwa ufadhili wa TAMISEMI.

Katika Kata za Mrama na Merya Kamati imepitia katika Mradi wa Matundu 19 ya vyoo vya kisasa vinavyojumuisha miundo mbinu ya walemavu katika shule za Msingi Makhandi na Mitula. Mradi huu umegharimu jumla ya shilingi milioni 46.1 kila mmoja ambapo miundombinu ya matundu 7 vyoo vya wavulana,matundu 9 vyoo vya wasichana na Matundu 3 ya vyoo vya walimu,vyoo vya watu wenye uhitaji maalum na kichomea taka imekamilika.

Mwenyekiti wa Kamati ya Fedha na Mipango Mhe. Elia Digha akiongea baada ya kuupokea Taarifa na kujionea Miradi hiyo ameomba ushirikishwaji wa Wananchi kwenye kuitunza Miradi hii ikiwa ni pamoja na kuhakikisha kunakuwa na upatikanaji wa Maji tiririka.