MAFUNZO YA UONGOZI KWA WENYEVITI WA VIJIJI NA VITONGOJI YAFANYIKA HALMASHAURI YA WILAYA YA SINGIDA

Posted on: December 18th, 2024

Mafunzo ya Uongozi kwa Wenyeviti wa Serikali za Vijiji na Vitongoji wa Halmashauri ya Wilaya ya Singida yameanza rasmi leo, tarehe 18/12/2024, katika ukumbi wa Shule ya Sekondari ya Ilongero. Lengo la mafunzo haya ni kuwajengea uwezo viongozi hawa katika masuala ya uongozi, hasa katika kuelewa mipaka ya majukumu kati yao na watendaji wa Kata na Vijiji, ili kuwawezesha kufanya kazi kwa weledi, kuimarisha ushirikiano, na kuepuka migogoro.

Mafunzo haya yanafanywa kwa ushirikiano na Ofisi ya Rais – Tawala za Mikoa na Serikali za Mitaa (OR-TAMISEMI), na yanaratibiwa na uongozi wa Halmashauri ya Wilaya ya Singida. Wahadhiri kutoka Chuo cha Serikali za Mitaa cha Hombolo wanatoa mafunzo haya kwa wenyeviti wa vijiji 84 na wenyeviti wa vitongoji 435. Mafunzo yatatolewa kwa makundi mawili; kundi la kwanza linalohusisha wenyeviti wa vijiji na vitongoji linaanza leo, na kundi la pili litahusisha viongozi wengine kesho, tarehe 19/12/2024.

Kupitia mafunzo haya, viongozi hao wanatarajiwa kupata ujuzi muhimu wa uongozi na usimamizi wa shughuli za kijamii, na hivyo kuchangia katika maendeleo endelevu ya jamii zao.