MAMA SAMIA LEGAL AID CAMPAIGN YAZINDULIWA RASMI SINGIDA

Posted on: January 10th, 2024

Waziri wa Katiba na Sheria Mhe Pindi Hazara Chana leo tarehe 10/01/2024 amezindua rasmi kampeni ya kitaifa ya msaada wa kisheria - Mama Samia Legal Aid Campaign katika Mkoa wa Singida kwa lengo la kuwafikia Wananchi wasio na uwezo wa kupata huduma hizo.

Mkoa wa Singida unakuwa ni Mkoa wa sita kuzindua huduma hizi ukiwa umetanguliwa na Mkoa wa Dodoma,Manyara,Shinyanga,Ruvuma na Simiyu ambapo huduma za msaada wa kisheria zitatolewa katika Kata na Mitaa yote ya Mkoa huu.

Mhe. Pindi Chana ameelezea nia ya Mhe. Rais kutaka kuhakikisha kwamba kila Mwananchi anakuwa na ufahamu wa masuala ya Sheria ikiwemo Haki na Wajibu wake na kwamba kila Mwananchi anaifikia haki na kwa wale wasiokuwa na uwezo wa kumudu Gharama za Watoa huduma za Kisheria(Mawakili) basi waweze kufikia kupitia huduma hizi za msaada wa Kisheria.

Mheshimiwa Rais aliunda Bodi ya kusimamia shughuli za msaada wa kisheria ambapo Huduma  hizi zinaratibiwa na Serikali kupitia Wizara ya Katiba na Sheria, Utaratibu unaosimamiwa vizuri na uko katika ngazi zote za Mikoa na Wilaya ili kuhakikisha upatikanaji wa Huduma za msaada wa kisheria kwa wakati hata kule pembezoni kabisa mwa nchi.

Awali akizungumza kabla ya kumkaribisha Waziri wa Sheria na Katiba Mkuu wa Mkoa wa Singida Mhe Peter Serukamba alimuhakikishia kwamba Mkoa wa Singida unaendelea kuunga mkono juhudi za Rais wa Jamhuri ya Muungano wa Tanzania Dkt Samia Suluhu Hassan katika nia yake thabiti ya kuondoka kadhia na viashiria vyote vya ukatili wa kijinsia na ulinzi wa haki za binadamu katika jamii pamoja na kushughulikia kero za wananchi wa Tanzania.

"Uzinduzi wa kampeni hii ni uthibitisho tosha kuwa Mhe Rais ni Muumini wa kweli na haki ,na haki siku zote huliinua Taifa, Mhe Rais ameamua kuliinua Taifa letu juu na Taifa lolote linaloamini katika haki ni Taifa lenye Maendeleo"