MHE. AYSHA ROSE MATEMBE ASHIRIKI MAADHIMISHO YA SIKU YA WANAWAKE WILAYA YA SINGIDA

Posted on: March 8th, 2024

Kuelekea maadhimisho ya siku ya wanawake duniani(8/3/2024) Mbunge wa Viti Maalum Jimbo la Singida Kaskazini Mhe. Aysha Rose Matembe ameshiriki kama mgeni rasmi kwenye sherehe za siku ya Wanawake katika Halmashauri ya Wilaya ya Singida.

Katika maadhimisho hayo Mhe. Aysha Rose Matembe  aligawa mitungi ya gesi 30 kwa mamalishe wa Tarafa ya Mtinko na kuwahimiza wanawake wa Singida Vijijini kubadilika na kutumia Nishati Safi kama majiko ya Gesi kwa shughuli za upishi ili kuokoa Mazingira.

Awali vikundi vilivyofanya marejesho kwa wakati vilipatiwa vyeti vya pongezi kwa kuwa waaminifu Mgeni rasmi na pia aliweza kupata nafasi ya kusikia shuhuda kutoka kwa Mwanamke Mjasiriamali aliyefanikiwa kutokana na Mkopo wa Mfuko wa wanawake unaotolewa na Halmashauri ya Wilaya.

Akiongea kwenye Shughuli hiyo Mgeni rasmi Mhe.Matembe amewasihi Wanawake wa Singida Kaskazini kujikita kwenye Kilimo kwani Rais wetu Mhe. Samia Suluhu Hassan ametoa Fedha nyingi kuborasha Sekta hiyo.

"Ninafahamu hapa Mkurugenzi wangu mnatoa Pembejeo za Kilimo lakini ninaomba zifike kwa wanawake Hawa,kama unavyoona ni wakulima Waziri wanalima vizuri na wanajitoa kwelikweli katika shughuli za ujasiriamali kwa hiyo tukiwekeza kwa Wanawake hawa Nina imani kubwa kabisa kwamba Kilimo katika Wilaya yetu ya Singida litakuwa ni chenye Tija na Habari ya ukosefu  wa Chakula itakwisha kabisa na tutalima Kilimo Cha Biashara na Chakula"

Sherehe za Maadhimisho ya Siku ya Wanawake zinatarajia kufanyika kesho kimkoa katika Wilaya ya Ikungi ambapo Mgeni rasmi anatarajiwa kuwa Mke wa Waziri Mkuu mstaafu Mama Tunu Pinda

ambapo kauli mbinu ya Mwaka huu ni

" Wekeza kwa Wanawake kurahisisha Maendeleo na Ustawi wa Jamii"