MHE. ELIA DIGHA AMEONGOZA MKUTANO MAALUM WA BARAZA LA MADIWANI.MHE. ELIA DIGHA AMEONGOZA MKUTANO MAALUM WA BARAZA LA MADIWANI.

Posted on: February 13th, 2026

Mwenyekiti wa Halmashauri ya Wilaya ya Singida Mhe. Elia Digha Mlangi, ameongoza mkutano maalum wa Baraza la madiwani wa kupitia na kujadili mpango na bajeti ya mwaka 2026/2027  leo tarehe 13/2/2026 katika ukumbi wa mikutano uliopo katika Ofisi ya Mkurugenzi Mtendaji wa Halmashauri ya Wilaya ya Singida. Katika mkutano huo, waheshimiwa madiwani wamepitia na wameidhinisha mapendekezo ya mpango na bajeti ya Halmashauri ya Wilaya ya Singida kwa mwaka wa fedha 2026/2027 wenye jumla ya Shilingi Bilioni 49,768,808,534/= ambapo katika hizo, kiasi cha fedha cha Shilingi Bilioni 3,075,255,710/= ni makisio ya bajeti itokanayo na mapato ya ndani ya Halmashauri.

Vilevile, Mkutano wa baraza hilo umepitia na kuidhinisha Mpango Mkakati wa Halmashauri ya Wilaya ya Singida wa kipindi cha miaka mitano,(2026/27 - 2030/31), ambapo waheshimiwa madiwani, wageni waalikwa pamoja na wakuu wa Divisheni na Vitengo walipata nafasi ya kujadili kwa pamoja namna ya kuongeza miradi ya kimkakati ili kuongeza kiwango cha ukusanyaji wa mapato ya Halmashauri.

Aidha, katika mkutano huo waheshimiwa madiwani pamoja na wageni waalikwa wamepata nafasi ya kupatiwa elimu kuhusiana na uandikishaji wa vitambulisho vya taifa pamoja na upatikanaji wa hati ya kusafiria yaani Passport,ambapo zoezi la uandikishaji wa vitambulisho vya taifa awamu ya pili litaanza hivi karibuni katika baadhi ya kata katika Halmashauri, na  elimu hii imetolewa na Maofisa kutoka Jeshi la Uhamiaji Wilaya ya Singida pamoja na Mamlaka ya Vitambulisho vya Taifa(NIDA) - Singida.

Waheshimiwa madiwani wameshauri namna mbalimbali za kuhakikisha bajeti hiyo inafikiwa ambapo wameshauri kuwa, kila mmoja katika nafasi na idara yake ahakikishe ukusanyaji wa mapato unaongezeka kwakuwa suala la mapato si la Afisa Biashara wala Mtunza Hazina pekee bali ni la kila mmoja.