MHE. GODWIN GONDWE ASIKILIZA MGOGORO WA MIPAKA KATI YA VIJIJI VYA MUNKHOLA NA MSIKII

Posted on: January 10th, 2025

Mkuu wa Wilaya ya Singida, Mhe. Godwin Gondwe, amefanya ziara katika hifadhi ya msitu wa kijiji cha Munkhola kwa lengo la kusikiliza mgogoro wa mipaka kati ya kijiji cha Munkhola kilichopo Kata ya Mgori na kijiji cha Msikii kilichopo Kata ya Munghamo na kushughulikia suala la uvamizi wa hifadhi ya msitu wa kijiji cha Munkhola.

Ziara hiyo ilihusisha wataamu mbali mbali kutoka Halmashauri ya Wilaya ya Singida, Singida Manispaa na Baraza la Taifa la Hifadhi na Usimamizi wa Mazingira (NEMC)

Akizungumza katika ziara hiyo, Mhe. Gondwe ameeleza kuwa migogoro ya mipaka na uvamizi wa maeneo ya hifadhi ni changamoto zinazozorotesha maendeleo ya jamii na kuhatarisha uhifadhi wa mazingira. Amewataka viongozi wa vijiji vyote viwili kushirikiana kwa maelewano ili kufanikisha suluhisho la kudumu.

Katika jitihada za kumaliza mgogoro huo, Mhe. Gondwe alitoa maazimio mbalimbali ya utekelezaji, ikiwemo kuwataka wataalamu wa ardhi kutoka Halmashauri ya Wilaya ya Singida kwenda katika eneo hilo ili kuonyesha mipaka rasmi kati ya vijiji hivyo. Aidha, alitoa agizo la kuhamishwa kwa wananchi waliojenda ndani ya hifadhi ya msitu huo ili kuendelea kulinda eneo hilo dhidi ya uharibifu. Pia, alisisitiza kupiga marufuku shughuli zote za kilimo ndani ya hifadhi hiyo, akibainisha kuwa hatua kali za kisheria zitachukuliwa dhidi ya wale watakaokiuka maagizo hayo.

Mhe. Gondwe alitoa wito kwa wananchi wa vijiji vyote kushirikiana na serikali katika kuhifadhi mazingira na kuhakikisha hifadhi ya msitu wa Munkhola inalindwa kwa manufaa ya kizazi cha sasa na kijacho.