MHE. GONDWE AZINDUA MSIMU WA KILIMO 2025/2026.

Posted on: October 22nd, 2025

Mwenyekiti wa Kamati ya Usalama ya Wilaya, ambaye pia ni Mkuu wa Wilaya ya Singida,  Mhe. Godwin Gondwe, akiongozana na Kamati ya Usalama ya Wilaya pamoja na Mkurugenzi Mtendaji wa Halmashauri ya Wilaya ya Singida, amezindua rasmi msimu mpya wa kilimo 2025/2026 leo tarehe 22 Oktoba, 2025, katika hafla ya uzinduzi iliyofanyika katika kijiji cha Mtinko, kilichopo katika kata ya Mtinko, katika Halmashauri ya Wilaya ya Singida.

Akihutubia mbele ya wananchi, wadau wa kilimo pamoja na wataalamu wa kilimo, Mhe. Gondwe ameishukuru Serikali kwa kutoa ruzuku ya pembejeo za kilimo kwa wananchi, na kusisitiza kuwa hilo si jambo dogo. “ Nataka niwaambie leo, si jambo la kawaida, katika nchi zetu za Afrika, kuona Serikali inaweza kutoa ruzuku kwa wakulima, leo tunashuhudia sisi wenyewe watu wetu ambao wamekuwa ni mawakala wa mbegu na mbolea, wanathibitisha wao wenyewe namna ambavyo biashara zao zimekuwa njema  baada ya kuingia kwenye mfumo wa ruzuku. Nchi ya Tanzania imeingia katika ramani ya dunia ya kumuwezesha mkulima katika upande wa ruzuku, ndugu zangu hili si jambo dogo” alisema Mhe. Gondwe.

 Vilevile Mhe. Gondwe ametoa vyeti vya pongezi kwa watumishi waliofanya kazi nzuri katika idara ya kilimo ya Halmashauri pamoja na wakulima waliofanya vizuri katika shughuli zao za kilimo, sambamba na utolewaji wa tuzo maalum kwa Mkuu wa Wilaya, Mkurugenzi Mtendaji wa Halmashauri na Mkuu wa idara ya Kilimo ya Halmashauri kwa kutambua kazi nzuri wanazozifanya katika kufanikisha shughuli za idara ya kilimo katika Halmashauri ya Wilaya ya Singida. Katika hafla hiyo ya uzinduzi,  Mhe. Gondwe meongoza wananchi,  kupita katika mabanda ya wadau wa kilimo na kujionea pembejeo za kilimo kama mbegu, mbolea na viuwatilifu pamoja na vifaa vya shughuli za kilimo kama vile trekta, ambapo wananchi wa Wilaya ya Singida wamepata nafasi ya kujifunza mambo mbalimbali yahusuyo kilimo kwa kupitia wataalamu na wadau wa kilimo.