MKUU WA MKOA AWAOMBA WATUMISHI KUFANYA KAZI ISIVYO KAWAIDA

Posted on: April 3rd, 2024

Mkuu wa Mkoa wa Singida Mhe Halima Dendego tarehe 03/04/2024 amefanya kikao na Waheshimiwa Madiwani na Watumishi wa Halmashauri ya Wilaya ya Singida ambapo katika kikao hicho amewataka kutokufanya kazi kwa mazoea na badala yake wafanye kazi isivyo kawaida.

Amewaomba Viongozi na Watendaji wa Halmashauri kuwa mfano na chachu ya kuleta mabadiliko chanya yatayopelekea maendeleo makubwa kwa Wananchi wa Halmashauri yetu.Akitolea mfano shughuli ya Kilimo Mhe Dendego amewataka Viongozi kuwa mstari wa mbele kwenye kufuata kanuni Bora za Kilimo chenye Tija ili Wananchi waweze kujifunza kupitia mashamba yao.

"Wananchi wetu wanajua mambo mengi sana( Kilimo) wanachokikosa ni Mtu wa kuwaonyesha njia"

Mkuu wa Mkoa pia amesisitiza swala la Ukusanyaji wa Mapato ya Halmashauri kwa kuweka wazi msimamo wake juu ya ulaji wa hela mbichi na kutopeleka Fedha benki kwa wakati , kwamba haikubaliani kabisa na jambo hilo na  ni miongoni mwa mambo asiyoweza kuvumilia kuina yanatendeka katika Halmashauri anazozisimamia.

Mhe Dendego pia amewaomba Watumishi kushirikiana na Waheshimiwa Madiwani kwa pamoja kutatua Changamoto zote zinazowakabili Wananchi wa Halmashauri ya Singida kwa kusikiliza kero zao na kuzitolea utatuzi kwa wakati. Amesisitiza kuwa Changamoto yoyote ikiwekwa wazi kwa watu wote lazima mawazo na njia ya kuikabili itapatikana.

"Kiongozi yeyote anayeng'ang'ana na Changamoto (peke yake)  huyo ni Mzembe, Mvivu wa kufikiri na asiyetaka kutimiza Majukumu yake"

Akiongea kwa niaba ya Wananchi wa Halmashauri ya Wilaya ya Singida Mwenyekiti wa Halmashauri Mhe.Elia Digha amemkaribisha mkuu wa Mkoa katika Halmashauri yetu na kumshukuru kwa maelekezo mazuri aliyoyatoa.