MKUU WA WILAYA YA SINGIDA APONGEZA BARAZA LA MADIWANI

Posted on: November 17th, 2023

Mkuu wa Wilaya ya Singida Mhe. Mhandisi Paskasi Muragili amelipongeza baraza la madiwani la Halmashauri  ya Wilaya ya Singida kwa kusimamia vyema shughuli ya Ukusanyaji wa Mapato na kuwezesha ukusanyaji wa takribani shilingi milioni 682 sawa na asilimia 45 ya Matazamio ya Bajeti kwa mwaka wa fedha 2023/ 2024. Mhe Muragili ameyasema hayo leo Novemba 17, 2023 katika kikao cha baraza la madiwani kilichokaa kwa siku ya pili kwenye ukumbi wa  ofisi ya Mkurugenzi  Mtendaji wa  Halmashauri ya Singida iliyoko eneo la Mwahango kata ya llongero.

Akiwa kwenye kikao hicho Mhe. Muragili amepata  wasaa wa kuzungumzia Kilimo kwa kuwasihi wananchi wa Halmashauri ya wilaya ya Singida kuhakikisha wanapanda mazao kulingana na matazamio ya  hali ya mvua ambapo kwa msimu huu inategemewa kutakuwapo na mvua za juu ya wastani. Aidha amewaeleza Waheshimiwa madiwani nia ya Serikali kupitia wizara ya Kilimo kuanzisha Shamba Darasa ambalo litawezesha vijana wa Halmashauri ya Wilaya ya Singida kujifunza Kilimo Bora. Tayari Serikali imeshapata eneo la kuanzisha Shamba hilo katika kata ya Mrama Kijiji cha Mrama lenye ukubwa wa Heka 2.5 ambapo kutachimbwa kisima cha maji kuwezesha upatikanaji wa maji ya kutosha  kwa kilimo cha umwagiliaji.

Akizungumzia juu ya utunzaji wa misitu ya asili na vyanzo vya maji Mhe. Muragili amelihakikishia baraza hilo la madiwani kwamba nia thabiti ya Serikali ni kuendelea kuulinda msitu wa Mgori kwa kuondoa wavamizi wote na kuweka alama za mipaka(becon)  ya eneo hilo ambalo linapakana na Wilaya ya Chemba  mkoa  wa Dodoma na Hanang iliyoko mkoa wa manyara ambazo zitachimbiwa kwa kusimamiwa na kamati za usalama za wilaya.

Akiongelea janga la Mlipuko wa Ugonjwa wa kuhara na kutapika Mhe. Muragili amewaomba Waheshimiwa Madiwani kutoa ushirikiano kwa kuhakikisha maeneo wanayotoka wananchi wanafuata sheria za Afya ya Msingi. Ametoa rai kwa Wananchi wote wa Wilaya ya Singida kuhakikisha kuwa wanakuwa na  Vyoo bora ili kuepukana na janga hilo na kuhakikisha kuwa halijirudii tena  katika Halmashauri ya Wilaya ya Singida  “ …operesheni ya kukamata watu wasiokuwa na vyoo bora inaanza rasmi … na mtu yeyote asiyekuwa na choo bora naomba achukuliwe hatua”, amesema Mhe. Muragili