MKUU WA WILAYA YA SINGIDA, MHE. GODWIN GONDWE, AKAGUA HUDUMA ZA AFYA HALMASHAURI YA WILAYA YA SINGIDA

Posted on: December 13th, 2024

Mkuu wa Wilaya ya Singida, Mhe. Godwin Gondwe, leo amefanya ziara ya kukagua huduma za afya katika Hospitali ya Wilaya na vituo vya afya vilivyopo Halmashauri ya Wilaya ya Singida, ikiwemo Kituo cha Afya cha Ilongero na Kituo cha Afya cha Msange. Lengo la ziara hiyo ilikuwa kutathmini hali ya utoaji huduma za afya na maendeleo ya miundombinu katika maeneo hayo.

Katika ziara hiyo, Mhe. Gondwe alielezea kuridhishwa na juhudi kubwa zinazofanywa na watendaji wa sekta ya afya katika kusimamia uboreshaji wa huduma kwa wananchi, akitaja mafanikio yaliyopatikana katika maeneo hayo. Hata hivyo, aliwahimiza viongozi na watendaji wa sekta ya afya kuongeza bidii katika kuhakikisha huduma bora zinaendelea kuboreshwa.

Aidha, Mhe. Gondwe alitoa wito kwa watekelezaji wa miradi ya ujenzi katika vituo vya afya kuongeza kasi ya utekelezaji wa miradi hiyo, ili kuhakikisha wananchi wanapata huduma bora za afya kwa wakati. Alisisitiza kuwa usimamizi bora na ufanisi katika miradi ya ujenzi ni muhimu katika kuimarisha huduma za afya kwa wananchi.

Vilevile, Mhe. Gondwe alisisitiza umuhimu wa vituo vya afya kuhakikisha vinakusanya na kuhifadhi takwimu sahihi za afya, ikiwemo taarifa za chanjo na lishe, ili kuziwezesha halmashauri kupanga mipango madhubuti ya maendeleo ya sekta ya afya. Alihimiza umuhimu wa kutumia takwimu hizo katika kubaini changamoto na kuboresha huduma zaidi kwa wananchi.