MWENGE WA UHURU WATEMBELEA KIKUNDI CHA VIJANA WA BODABODA MTINKO

Posted on: July 20th, 2025

Mwenge wa Uhuru umefanya ziara katika Kata ya Mtinko na kutembelea kikundi cha vijana wa bodaboda ambacho ni miongoni mwa wanufaika wa mikopo ya asilimia 10 ya mapato ya Halmashauri, inayotolewa kwa ajili ya kuwawezesha kiuchumi wanawake, vijana, na watu wenye ulemavu.

Katika ziara hiyo, Mkimbiza Mwenge wa Uhuru Kitaifa, Comrade Ismail Ali Ussi, alionesha kuridhishwa na namna Halmashauri ya Wilaya inavyotekeleza agizo la serikali kwa kutenga sehemu ya mapato yake ya ndani ili kuwezesha makundi maalum. Aidha, alionesha matumaini makubwa kwa kikundi hicho cha vijana ambao wameamua kujiajiri kupitia shughuli halali za usafirishaji badala ya kusubiri ajira rasmi.

Kikundi hicho kimefanikiwa kupata pikipiki mpya nane kupitia mkopo huo, ambazo zitatumika katika kuboresha huduma za usafiri kwa wananchi wa Mtinko na maeneo ya jirani. Uzinduzi wa pikipiki hizo umefanyika rasmi katika ziara hiyo ya Mwenge wa Uhuru.

Ziara ya Mwenge wa Uhuru inaendelea katika maeneo mbalimbali nchini ikiwa na lengo la kuhamasisha maendeleo, uzalendo, na ushiriki wa vijana katika shughuli za kiuchumi na kijamii. Kaulimbiu ya mwaka huu ni "Jitokeze Kushiriki Uchaguzi Mkuu wa Mwaka 2025 kwa Amani na Utulivu."