MWENGE WA UHURU WAZINDUA MRADI WA MAJI KIJIJI CHA KINYAMWENDA

Posted on: July 20th, 2025

Mwenge wa Uhuru umezindua rasmi mradi mkubwa wa maji katika Kijiji cha Kinyamwenda, Tarafa ya Mgori, Kata ya Itaja, mradi unaogharimu shilingi 955,205,436.75 zilizotolewa na Serikali Kuu kupitia mpango wa Lipa Kulingana na Matokeo (PforR).

Mradi huo ambao sasa umekamilika kwa asilimia 100, unalenga kuboresha upatikanaji wa maji safi na salama kwa wakazi wa Kinyamwenda na maeneo ya jirani. Kiongozi wa Mbio za Mwenge wa Uhuru Kitaifa, Comrade Ismail Ali Ussi, ndiye aliyefanya uzinduzi rasmi wa mradi huo.

Akizungumza wakati wa uzinduzi huo, Comrade Ussi alitoa pongezi kwa usimamizi mzuri wa mradi hadi kukamilika kwake, na kusisitiza kuwa mradi huo ni kielelezo cha dhamira ya serikali ya kupeleka huduma muhimu vijijini. Aidha, aliwataka wananchi kuutunza miundombinu ya maji ili mradi huo uwe endelevu kwa manufaa ya kizazi cha sasa na kijacho.

Mradi huu unahusisha ujenzi wa tanki la maji lenye uwezo wa kubeba lita 100,000 lililowekwa juu ya nara ya mita sita, ujenzi wa uzio, vituo 12 vya kuchotea maji, Mrambo mmoja wa kunyweshea mifugo, Mtandao wa mabomba wenye urefu wa kilomita 14.6 pamoja na mfumo wa nishati ya jua kwa ajili ya kuendesha pampu.

Pampu ya mradi huu ina uwezo wa kusukuma lita 13,500 kwa saa, na inatarajiwa kuwanufaisha zaidi ya wananchi 3,134 pamoja na mifugo 4,175, kwa kuwapatia maji safi na salama karibu na makazi yao.