MWENYEKITI WA HALAMSHAURI YA WILAYA YA SINGIDA PAMOJA NA WATAALAMU KUTOKA NEMC WATEMBELEA MAZIWA MAWILI KATA YA MAKURO

Posted on: January 11th, 2025

Mwenyekiti wa Halmashauri ya Wilaya ya Singida Mhe. Elia Digha pamoja na wataalamu kutoka Baraza la Taifa la Hifadhi na Usimamizi wa Mazingira (NEMC) na Halmashauri ya Wilaya ya Singida wametembelea Kata ya Makuro kuangalia maziwa mawili yaliyopo eneo hilo, ambayo yamejaa maji na kusababisha wasiwasi kwa wananchi wa vijiji vinavyozunguka maziwa hayo.

Ziara hiyo ililenga kufahamu hali halisi ya maziwa hayo na kutoa ushauri wa kitaalamu ili kuepusha madhara yanayoweza kujitokeza kutokana na mabadiliko ya hali ya mazingira.

Akizungumza na wananchi wa kata hiyo, Afisa Mazingira kutoka NEMC, Bw. Innocent Makomba, alisisitiza umuhimu wa kulinda vyanzo vya maji kwa kuacha mara moja kufanya shughuli za kilimo pembezoni mwa maziwa hayo. Alieleza kuwa kilimo karibu na vyanzo vya maji husababisha uharibifu wa mazingira na kupunguza uwezo wa vyanzo hivyo kuhifadhi maji, hali ambayo inaweza kusababisha maafa kama mafuriko au ukame wa muda mrefu.

“Ni muhimu sana kulinda vyanzo hivi vya maji kwa ajili ya kizazi cha sasa na kijacho. Shughuli za kilimo pembezoni mwa maziwa haya zinaharibu mazingira na kusababisha hatari kubwa kwa maisha ya watu na mifugo,” alisema Bw. Makomba.

Naye Mwenyekiti wa Halmashauri ya Wilaya ya Singida aliwahimiza wananchi kufuata ushauri wa wataalamu na kuelekea kwenye kilimo cha kisasa kinachozingatia utunzaji wa mazingira. Alibainisha kuwa kilimo cha kisasa siyo tu kwamba kinachangia uzalishaji bora wa mazao, bali pia kinaweka mazingira salama kwa kila mtu.