Mwenyekiti wa Halmashauri ya Wilaya ya Singida ashiriki Ibada ya Mazishi ya aliyekuwa Diwani wa Kata ya Mrama

Posted on: September 4th, 2024

Uongozi wa Halmashauri ya Wilaya ya Singida, ukiongozwa na Mwenyekiti wa Halmashauri hiyo, Mhe. Elia Digha, umeungana na waombolezaji katika ibada ya mazishi ya aliyekuwa Diwani wa Kata ya Mrama, Mhe. Charles Abeid Msonia. Ibada hiyo imefanyika nyumbani kwa marehemu kata ya Mrama, tarehe 04/09/2024, na kuhudhuriwa na viongozi wa serikali, wawakilishi wa vyama vya siasa, viongozi wa dini, wananchi wa Kata ya Mrama na maeneo jirani.

Akizungumza katika ibada hiyo, Mhe. Digha alimsifu marehemu kwa utendaji wake bora kama kiongozi wa Halmashauri.

“Marehemu Mhe. Msonia amehudumu katika Baraza la Halmashauri ya Wilaya ya Singida kwa miaka tisa. Alikuwa diwani mwaminifu, mchapakazi na mtetezi wa wananchi wa Kata ya Mrama. Hakuwa na makuu, alikuwa mcheshi, na alipenda sana muziki. Kifo chake kimetuachia pengo kubwa ambalo ni vigumu kuliziba." alisema Mhe. Digha.

Naye Mbunge wa Jimbo la Singida Kaskazini, Mhe. Ramadhani Abeid Ighondo, alitoa salamu zake za rambirambi. Alimshukuru Mkurugenzi wa Halmashauri kwa ushirikiano alioutoa wakati wa ugonjwa wa Mhe. Msonia.

"Tangu Mhe. Msonia alipoanza kuumwa, ulikuwa naye karibu, na umejaribu kutoa msaada wa kila namna. Napenda kuwahakikishia wananchi wa Kata ya Mrama kuwa masuala yote mliyokuwa mkimfikishia marehemu, yataendelea kufanyiwa kazi. Pia, tuheshimu utaratibu wa serikali, ambapo mtendaji wa kata ataendelea kukusanya kero zenu." alisema Mhe. Ighondo.

Kwa upande wake Mwenyekiti wa CCM Mkoa wa Singida, Mhe. Martha Mlata, alikumbusha mchango wa marehemu katika maendeleo ya kata hiyo, akieleza jinsi Mhe. Msonia alivyojitahidi kuunganisha Kata ya Mrama na serikali kuu chini ya uongozi wa Mhe. Rais Dr. Samia Suluhu Hassan. "Amefanikisha kuletwa kwa maendeleo makubwa katika kata hii, na hilo ni jambo ambalo hatutakaa tusahau" alisema. Pia Mhe. Mlata alimteua Mhe. Aysha Rose Matembe kuwa Diwani wa kata ya Mrama mpaka hapo serikali itakavyoamua vinginevyo.

Mhe. Charles Abeid Msonia alizaliwa mwaka 1962 katika Kijiji cha Mwakiti, Kata ya Mrama, Wilaya ya Singida. Alisoma Shule ya Msingi Sekoutoure na kuhitimu mwaka 1981. Mhe. Msonia alibatizwa katika Kanisa la Kiinjili la Kilutheri Tanzania (K.K.K.T) Kijota mwaka 1993 na baadaye kufunga ndoa na mkewe Bi. Elizabeth S. Idabu mwaka 1999. Ameacha mjane na watoto watano, wanne wa kiume na mmoja wa kike, pamoja na wajukuu wanne.

Kipindi cha uhai wake Mhe. Msonia alijishughulisha na kilimo, ufugaji, na biashara pia aliwahi kushika nyadhifa mbalimbali za uongozi ndani ya Chama Cha Mapinduzi (CCM) na kanisa. Alikuwa mjumbe wa Halmashauri Kuu ya Chama Kata ya Mrama kuanzia mwaka 2010 hadi 2015, na Diwani wa Kata hiyo tangu mwaka 2015 hadi umauti ulipomkuta.