RC SINGIDA AZINDUA JENGO JIPYA LA UTAWALA

Posted on: August 16th, 2023

Mkuu wa Mkoa wa Singida Mhe. Peter Joseph Serukamba amewataka watumishi wa Halmashauri ya Wilaya ya Singida kuendelea kutoa huduma bora kwa wananchi. Hayo ameyasema siku ya jumanne ya tarehe 15, Agosti 2023 kwenye hafla fupi ya uzinduzi wa utoaji huduma katika jengo jipya la Halmashauri ya Wilaya ya Singida lililopo kijiji cha Mwahango kata ya Ilongero.

“Niombe ndugu zangu na wafanyakazi wa Halmashaurii tutoe huduma bora kwa wananchi , tujipe nafasi ya kuwasikiliza watu matatizo yao” amesema Serukamba.

Akizungumza na wananchi, viongozi wa vyama vya siasa, viongozi wa dini, wazee mashuhuri pamoja na watumishi wa Halmashauri, Mhe. Serukamba ameitaka idara ya ardhi kuendelea kupangilia mji wa Ilongero vizuri zaidi katika bajeti ya mwaka wa fedha 2023/ 2024 kwani uwepo wa makao makuu ya Halmashauri katika kata ya Ilongero kunatoa fursa kubwa katika ongezeko la huduma za kijamii na kiuchumi.

Aidha Mhe. Serukamba ameishukuru serikali ya awamu ya sita inayoongozwa na Mhe. Dkt. Samia Suluhu Hassan, Rais wa Jamhuri ya Muungano wa Tanzania kwa uwekezaji mkubwa katika miradi ya maendeleo mkoani Singida ikiwemo miradi ya kilimo na umwagiliaji, mradi wa maji safi na salama, umeme, TASAF, barabara na miradi ya shule, angalau kila kijiji kina mradi wa maendeleo unaotekelezwa.

Picha ya pamoja na mgeni rasmi ambaye ni Mkuu wa Mkoa wa Singida Mhe. Peter Joseph Serukamba(wa nne kulia) katika hafla fupi ya uzinduzi wa utoaji huduma kwenye jengo jipya la Halmashauri ya Wilaya ya Singida. Wapili kushoto ni   Mbunge wa jimbo la Singida Kaskazini Mhe. Ramadhan Abeid Ighondo na watatu kulia ni Mwenyekiti wa Halmashauri ya Wilaya hiyo Mhe. Elia Digha