SINGIDA DC YAZINDUA MSIMU WA UPANDAJI MITI

Posted on: January 16th, 2024

“Kupanda miti ni hatua moja… na kuitunza ni hatua nyingine… ninaomba sana sana... kwa sisi viongozi tuliopo hapa kwa hii miti iliyopandwa hapa leo tuitunze, tuiangalie ” hayo yamesemwa na mwakilishi wa Mkuu wa Wilaya ya Singida Mhe. Naima Chondo ambaye pia ni Katibu Tawala wa Wilaya hiyo katika uzinduzi wa wiki ya upandaji miti iliyofanyika Shule ya Sekondari Mkimbii kata ya Kinyeto Halmashauri ya Wilaya ya Singida.

Akiongea na wananchi, wadau wa misitu, mazingira pamoja na viongozi wa chama na Serikali, Chondo amewataka wananchi wa Halmashauri ya Wilaya ya Singida kutumia msimu huu wa mvua katika kupanda miti na kuitunza katika kukabiliana na mabadiliko ya tabia nchi. Aidha uzinduzi wa msimu wa upandaji miti Wilaya ya Singida umeongozwa na Wakala wa Misitu Tanzania (TFS) wakishirikiana na wadau kutoka shirika la “Tree For The Future”, pamoja na viongozi kutoka Taasisi ya Mwalimu Nyerere Wilaya ya Singida ambapo zaidi ya miti 400 imepandwa katika eneo hilo.

Kwa upande wake Mwenyekiti wa Halmashauri ya Wilaya ya Singida Mhe. Elia Digha ameitaka jamii ya Singida kuwa na mtizamo chanya katika kutunza mazingira kwa kupanda miti, “katika kuhakikisha mazingira yanakuwa bora ni lazima tupande miti”, alisisitiza Digha. Akibainisha faida za miti ni pamoja na upatikanaji wa hewa safi ya Oksijeni, uvunaji wa hewa ya ukaa, miti ya matunda na miti mingine hutumika katika tiba za magonjwa  na utafiti wa kisayansi.

Kwa upande wake mwakilishi wa shirika la “Tree For The Future” Singida Ndg. Abraham Mrema amesema mojawapo ya shughuli wanazozifanya ni uoteshaji wa vitalu vya miche ya kivuli na matunda, kupanda miti maeneo ya taasisi binafsi na Serikali  pamoja na kilimo cha bustani msitu. Mrema ametaja faida mbalimbali za kilimo cha bustani msitu ni pamoja na kuongeza usalama wa chakula, chanzo cha vyakula aina mbalimbali vyenye lishe kwa kaya 1318 za wakulima kupitia upandaji wa mboga mboga na miti ya matunda. Hata hivyo Mrema amesema kwa mwaka 2024/ 2025 shirika lake lina mpango wa kupanda jumla ya miti 826,255 katika Halmashauri ya Wilaya ya Singida.

Aidha mwakilishi wa Mkuu wa Wilaya ya Singida Mhe. Naima Chondo ameishukuru Serikali ya Awamu ya Sita inayoongozwa na RAIS Mhe. Dkt. Samia Suluhu Hassan kwa uwekezaji mkubwa wa miradi ya maendeleo ya wananchi katika Wilaya ya Singida katika sekta za elimu, afya, umeme kupitia wakala wa umeme vijijini (REA), maji na barabara.