TARI WATOA MAFUNZO YA KANUNI ZA KILIMO BORA CHA KOROSHO

Posted on: September 10th, 2024

Wakulima wa zao la Korosho wa Halmashauri ya Wilaya ya Singida pamoja na maafisa ugani wapokea mafunzo kutoka kwa wataalamu kutoka Taasisi ya Utafiti wa Kilimo Tanzania (TARI) – Naliendele. Mafunzo hayo yametolewa tarehe 08/09/2024 katika shamba la Mustapha Mwangi (mkulima) lilipo kata ya Ilongero yakiwahusisha wakulima 30 pamoja na maafisa ugani 15 wa wilaya.

Akizungumza katika mafunzo hayo, Gaspar Mgimiloko amabaye ni mtafiti kutoka TARI alisisitiza umuhimu wa matumizi sahihi na salama ya viwatilifu ili kudhibiti visumbufu vya Korosho, lengo likiwa ni kupunguza athari za wadudu na magonjwa yanayoweza kupunguza uzalishaji na tija ya zao hilo.

Pia, mafunzo hayo yaliangazia upuliziaji wa viwatilifu, matumizi ya mavazi kinga, mbegu bora, utunzaji wa shamba, uchanganyaji wa mazao na upogoleaji. Mgimiloko alibainisha kuwa mafunzo haya ni muhimu kwa maafisa ugani, hasa wale waajiriwa wapya, ili kuongeza uelewa wao kuhusu uzalishaji wa korosho, hususan wanatoka maeneo ambayo hayana uzoefu na zao hili.

 “Lengo la kuwajumuisha wakulima na maafisa ugani tunaamini maafisa ugani tayari wana mafunzo waliyo yapata vyuoni lakini kuna maafisa ugani ambao ni waajiriwa wapya yamkini wanatoka sehemu au kanda ambazo hazilimi zao la Korosho kwa hiyo lengo pia ni kuwaongezea wigo wa uelewa juu ya uzalishaji wa zao la Korosho” Alisema Mgimiloko

Kwa upande wake afisa ugani mifugo kata ya Kinyagigi Vaileth Nyamwonyo ameshukuru uwepo wa mafunzo hayo kwa kumwezesha kuwa na ujuzi wa namna  bora ya uzalishaji wa Korosho. Naye afisa ugani kilimo kata ya Mtinko Emmanuel  Ambrose, alieleza kuridhishwa kwake na mafunzo kwa sababu yatasaidia katika kuelimisha wakulima wengine.

Naye Mkulima Emiliana Lisu kutoka kata ya Kinyagigi ameahidi kuyafanyia kazi mafunzo aliyoyapata ikiwa ni pamoja aina na matumizi sahihi ya viwatilifu, namna nzuri ya upandaji Korosho pamoja na ujuzi wa kuhusu udongo unaofaa.

“Mafunzo haya yamenisaidia mimi kama mkulima wa Korosho kufahamu namna bora ya kulima zao hili na pia nimefahamu udongo unaofaa kwa kuotesha Mikorosho na matumizi sahihi ya viwatilifu.” Alisema Emiliana.

Mmiliki wa shamba lililotumika kwa mafunzo Mustapha Mwangi, alieleza nama mafunzo yalivyomsaidia kufahamu thamani ya kilimo cha korosho na kuboresha shamba lake, ambalo hapo awali halikutoa mavuno mazuri.

 “Nimefaidika na mafunzo haya kwa sababu mambo mengi tulikuwa tunasoma kwenye makaratasi na vitabu ila tunashindwa tuyafanyaje ila kupitia ujio wa mafunzo haya nimefahamu nini hasa cha kufanya ili kuboresha shamba langu kwa sababu mikorosho yangu ilikuwa haitoi mavuno mazuri hivyo sijawahi kuvuna na kupata faida yoyote kupitia hii mikorosho.” Alisema Mustapha Mwangi.

Jumla ya ekari 268 hutumiwa na wakulima wa Halmashauri ya Wilaya ya Singida kulima zao la Korosho.