UWEKAJI WA JIWE LA MSINGI KATIKA ZAHANATI YA KIJIJI CHA MAKHANDI KUFUATIA WIKI YA MAADHIMISHO YA MIAKA 59 YA MUUNGANO WA TANGANYIKA NA ZANZIBAR

Posted on: April 25th, 2023

Mkuu wa Wilaya ya Singida Mhe. Mhandisi Paskasi Damian Muragili aweka jiwe la msingi katika ujenzi wa Zahanati ya kijiji cha Makhandi, iliyopo kata ya Mrama ndani ya Halmashauri ya Wilaya ya Singida. Akizungumza na wanufaika wa mradi, Mhe. Muragili amewapongeza wananchi kwa kuupokea mradi wa Zahanati na kuendelea kuungana mkono jitihada za Serikali ya awamu ya sita inayoongozwa na Mhe. Dr. Samia Suluhu Hassan, Rais wa Jamhuri ya Muungano wa Tanzania katika wiki ya Maadhimisho ya Miaka 59 ya Muungano wa Tanganyika na Zanzibar chini ya Kauli Mbiu isemayo ''Umoja na Mshikamano ndiyo nguzo ya kukuza uchumi wetu''. Aidha Mkuu huyo wa Wilaya ya Singida amewataka wananchi kuendelea kuenzi, kulinda na kutunza tunu za Muungano wetu ambazo ni UMOJA na MSHIKAMANO kwani katika kipindi cha miaka 59 ya Muungano wa Tanganyika na Zanzibar, Halmashauri ya Wilaya ya Singida imeweza kupiga hatua kubwa ya kimaendeleo katika  sekta mbali mbali ikiwemo elimu, afya, maji, miundo mbinu na umeme kupitia wakala wa umeme vijijini na mijini, yaani REA.  Ikumbukwe kuwa Halmashauri ya Wilaya ya Singida ilipokea kiasi cha  Tshs. milioni 50 fedha kwa ajili ya ukamilishaji wa  Zahanati ya kijiji cha Makhandi  iliyojengwa kwa nguvu za wananchi.  Mhe. Muragili amewataka wananchi wa kijiji cha Makhandi na Halmashauri ya Wilaya ya Singida kwa ujumla kushiriki katika chaguzi  za Serikali za mitaa kwa mwaka 2024 na uchaguzi mkuu kwa mwaka 2025. Hata hivyo wananchi wa kijiji cha Makhandi wameishukuru Serikali ya Jamhuri ya Muungano wa Tanzania kwa kusogeza huduma ya afya  karibu na wananchi na hivyo kuwapunguzia umbali waliokuwa wakisafiri kufuata huduma ya afya katika kituo cha afya Ilongero.