WALIMU SINGIDA WAJENGEWA UWEZO WA UFUNDISHAJI NA UJIFUNZAJI WA KIINGEREZA NA KKK KWA KUZINGATIA MTAALA ULIOBORESHWA MWAKA 2023

Posted on: February 13th, 2024

Hayo yamejiri katika mafunzo yanayoendelea kutolewa ukumbi wa kituo cha walimu (TRC) Halmashauri ya Wilaya ya Singida yanayoendeshwa na Ofisi ya Rais- TAMISEMI na Wizara ya Elimu, Sayansi na Teknolojia kupitia Taasisi ya Elimu Tanzania (TET) kwa kushirikiana na Programu ya Shule Bora ambapo imeandaa Mafunzo Endelevu ya Walimu Kazini (MEWAKA) ambapo  wawezeshaji kutoka Taasisi ya Elimu Tanzania (TET) wanawezesha walimu wanaofundisha darasa la kwanza kwa muda wa siku tano kuanzia tarehe 12 hadi 16 Februari, 2024. Aidha Mratibu wa mafunzo kutoka Taasisi ya Elimu Tanzania Ndg. Mbezi Benjamin amewataka walimu wanaofundisha madarasa ya awali na darasa la kwanza kuwa wabunifu na mahiri katika kutumia zana za kufundishia na kujifunza zilizopo katika maeneo yao na hasa katika kuwashirikisha wanafunzi.

Benjamin amebainisha endapo walimu watakuwa mahiri katika kuzingatia mbinu bora na shirikishi za ufundishaji na ujifunzaji wa Kiingereza na KKK (Kusoma, Kuandika na Kuhesabu) kwa kuzingatia mtaala ulioboreshwa wa mwaka 2023 utamuwezesha mtoto kujua KKK na kutamka maneno ya kiingereza kwa ufasaha.

Hata hivyo muwezeshaji kutoka Taasisi ya Elimu Tanzania (TET) Dkt. Joyce Mchilo amebainisha baadhi ya mafanikio yatakayoweza kupatikana baada ya mafunzo kwa walimu wanaofundisha madarasa ya awali na la kwanza ni kumuwezesha mwalimu kufanya maandalizi ya ufundishaji na ujifunzaji kulingana na mtaala ulioboreshwa na kutumia mbinu ya CLT (Communicative Language Teaching) na zana stahiki ili kujenga umahiri wa mwanafunzi katika kuzungumza, kusikiliza, kusoma na kuandika lugha ya Kiingereza.

Mafanikio mengine ni pamoja na kumjengea uwezo mwalimu kutumia mbinu na zana stahiki katika kufundisha stadi za KKK na kubuni mbinu mbalimbali za kufundisha darasa jumuishi kwa ufanisi.

Aidha walimu wa Halmashauri ya Wilaya ya Singida wameishukuru Serikali ya awamu ya Sita inayoongozwa na RAIS Mhe. Dkt. Samia Suluhu Hassan kwa kuwaletea mafunzo haya kwani yamewajengea mbinu bora za ujifunzaji na ufundishaji na hivyo kuwaongezea umahiri katika kufundisha darasani.