WATUMISHI WA HALMASHAURI YA SINGIDA WAPEWA MAFUNZO YA MATUMIZI YA SERIKALI MTANDAO

Posted on: December 11th, 2024

Watumishi wa Halmashauri ya Wilaya ya Singida wamepatiwa mafunzo maalum kuhusu matumizi ya serikali mtandao, yaliyoandaliwa na Mamlaka ya Serikali Mtandao (e-Government Authority).

Mafunzo hayo yaliyofanyika leo tarehe 11/12/2024 katika ofisi za Halmashauri ya Wilaya ya Singida zilizopo kijiji cha Mwahango yalijikita katika mada mbalimbali, zikiwemo maana ya serikali mtandao, mifumo inayotumika ndani ya serikali mtandao, sheria na miongozo inayosimamia matumizi ya serikali mtandao, pamoja na majukumu ya Mamlaka ya Serikali Mtandao.

Lengo kuu la mafunzo haya ni kuwajengea uwezo watumishi wa umma katika kutumia teknolojia kuboresha utoaji wa huduma, kuongeza uwazi, na kuimarisha ufanisi wa utendaji kazi serikalini.