MKUU WA MKOA WA SINGIDA AFANYA ZIARA YA KIKAZI MSITU WA MUNKHOLA.

Posted on: May 11th, 2023

Mkuu wa Mkoa wa Singida Mhe. Peter Joseph Serukamba amefanya ziara ya kikazi katika kijiji cha Munkhola, kata ya Mgori ndani ya Halmashauri ya Wilaya ya Singida kufuatia uvamizi wa hifadhi ya msitu wa Munkhola, kata ya Mgori unaopakana na kijiji cha Msikii, kata ya Mughamo leo tarehe 11 Mei, 2023.  Akizungumza na wananchi wa vijiji vya Munkhola na Msikii Mhe. Peter Joseph Serukamba amepiga marufuku shughuli zote za kibinadamu zinazoendelea kufanyika ndani ya hifadhi ya msitu wa Munkhola. Ikumbukwe kuwa mwezi Januari, 2023 Mkuu wa Wilaya ya Singida Mhe. Paskasi Muragili akiongozana na Mkurugenzi Mtendaji wa Halmashauri ya Wilaya ya Singida ndugu Ester Chaula waliongoza zoezi la upandaji miti  zaidi ya 8,000 kwenye eneo la hifadhi ya msitu wa Munkhola katika kuendelea kutunza misitu ya asili na kutunza vyanzo vya maji kwa manufaa ya kizazi cha sasa na cha baadae.

 “Ni marufuku Kulima, Kufuga na Kujenga katika hifadhi ya eneo la msitu wa Munkhola, na yeyote atakaekwenda kinyume na maelekezo ya Serikali hatua kali za kisheria zitachukuliwa dhidi yake”, alisisitiza Mkuu wa Mkoa wa Singida Mhe. Serukamba.