ACTION AGAINST HUNGER - USA, WAFANYA KIKAO KAZI KUJADILI UTEKELEZAJI WA MRADI WA GO - GREEN.

Posted on: October 18th, 2025

Shirika lisilo la kiserikali la Action Against Hunger - USA wamefanya kikao kazi cha kujadili mapitio ya utekelezaji wa mradi wa Go - Green unaotekelezwa katika shule za Nane za Serikali, zikiwemo za Msingi(3) na Sekondari(5) na kwa wanajamii wa Halmashauri ya Wilaya ya Singida. Kikao hicho kilichofanyika katika Ukumbi wa RC - Social Hall Singida - Mjini, kimehusisha Walimu wa Shule za Msingi na Sekondari ambazo mradi huu unatekelezwa, Viongozi na Watendaji wa Serikali ngazi ya Kata ambako mradi huu unatekelezwa pamoja na wataalamu kutoka katika idara ya Kilimo, Afya na Elimu katika ngazi ya Halmashauri.

Lengo la kikao hicho, lilikuwa ni kuwasilisha taarifa ya utekelezaji wa Mradi na kujadiliana masuala mbalimbali yahusuyo utekelezaji wa mradi, changamoto pamoja na mafanikio ya Mradi pamoja na kugawa mbegu za mbogamboga na matunda. Mradi wa Go - Green unatekelezwa na Shirika la Action Against Hunger - USA na kufadhiliwa na Taasisi ya Buddhist Global Relief, kwa lengo la kuhamasisha mwitikio wa jamii kuhusiana na mahitaji ya lishe kwa wanawake wajawazito, wanaonyonyesha, watoto na vijana balehe. Mradi unahusisha utengenezaji wa bustani za mbogamboga na matunda kwa njia ya umwagiliaji wa matone na njia ya kawaida.