DC GONDWE AWAASA WATUMISHI KUDUMISHA AMANI NA USHIRIKIANO.

Posted on: October 27th, 2025

Mkuu wa Wilaya ya Singida, Mhe. Godwin Gondwe, ametoa wito kwa watumishi wa umma katika Halmashauri ya Wilaya ya Singida kuthamini na kulinda amani ya nchi pamoja na ya mkoa huo kwa ujumla. Mhe. Gondwe alitoa wito huo leo tarehe 27 Oktoba, 2025 katika kikao na watumishi wa halmashauri kilichofanyika katika ukumbi mdogo wa mikutano uliopo katika ofisi za Halmashauri ya Wilaya ya Singida.

Amesema ni jukumu la kila mtumishi wa umma kuhakikisha anadumisha amani na kuiepuka migogoro au vitendo vyovyote vinavyoweza kusababisha uvunjifu wa amani, akisisitiza kuwa amani ni nguzo muhimu ya maendeleo ya taifa. Pia amewaasa watumishi kuendelea kutoa ushirikiano na huduma bora kwa wananchi wote wanaokuja kupata huduma katika halmashauri ya Wilaya ya Singida.