HALMASHAURI YA SINGIDA YAANDAA KIKAO CHA WADAU WA UVUVI KUJADILI USALAMA WA WAVUVI NA KUONGEZA MAPATO YA SAMAKI

Posted on: December 30th, 2024

Mwenyekiti wa Halmashauri ya Wilaya ya Singida Mhe.Elia Digha akishirikiana na Kaimu Mkurugenzi Bi.Janeth Mbugha, ameongoza kikao cha wadau wa uvuvi kilichowakutanisha madiwani, viongozi wa wavuvi, wenyeviti na watendaji wa kata na vijiji vinavyozungukwa na mabwawa ya samaki na wataalamu wa Idara ya uvuvi na Timu ya mapato ya Halmashauri.Kikao hicho kimefanyika leo tarehe 30/12/2024 katika Ukumbi mkubwa uliopo katika Ofisi za Halmashauri ya Wilaya ya Singida,kwa lengo la kujadili mambo mbalimbali kuhusiana na shughuli za uvuvi,hususan suala la ukusunyaji wa mapato yatokanayo na uvuvi wa samaki.

Akifungua kikao hicho  Mhe.Elia Digha amewasisitiza wenyeviti na watendaji  wa vijiji na kata,kutambua uongozi wa wavuvi kwa kuwasajili wavuvi wote na kuwajua wageni wanaoingia katika vijiji vyao kwaajili ya shughuli za uvuvi ili iwe rahisi kudhibiti vitendo vya kihalifu kwa kuwatambua wahalifu na kuwakamata.

“ Kuna wavuvi wageni ambao wanaenda kila mahali,hivyo watu kama hawa wanaofanya mzunguko mkubwa ni lazima pia tujiridhishe kwa kutambua uongozi wa wavuvi,tukawajua wavuvi wote na usajili wao wote,maana wapo wasio na nia njema ambao wanafanya uhalifu huko, wanakuja kujificha kwenye maeneo yetu ya uvuvi,hivyo anapokuja mgeni tujue huyu ni mgeni kaja, tujuane ili twende vizuri.” Alisema Mhe.Digha.

Pamoja na hayo, wavuvi hao na viongozi wao wa kata na vijiji walipata nafasi ya kuwasilisha changamoto zao na kupatiwa majibu katika kuongeza ufanisi wa kazi zao za uvuvi na ukusanyaji wa mapato ya samaki.

Vilevile katika kikao hicho yaliazimiwa masuala kadha wa kadha,yaliyotolewa kwa wadau wote walihudhuria kikao hicho,ambapo kila mmoja kwa nafasi yake alisisitizwa kutimiza wajibu wake katika kuhakikisha  ukusanyaji wa mapato ya samaki unaongezeka.Maazimio hayo ni kama,matumizi ya Life Jacket ( koti la kuokoa) kwa wavuvi wote katika kujihakikishia usalama wao wawapo katika shughuli zao za uvuvi,uundwaji wa vikundi vya wavuvi vinavyokopesheka, kuacha matumizi ya nyavu haramu za kuvulia samaki kwa lengo la kulinda mazalia ya samaki,na pia Maafisa wa serikali watengeneze urafiki na wavuvi ili kurahisisha ukusanyaji wa mapato ya samaki.