HALMASHAURI YA WILAYA YA SINGIDA YAADHIMISHA SIKU YA MNYAMAKAZI PUNDA KWA KUPAZA SAUTI YA USTAWI NA HAKI ZA WANYAMA

Posted on: July 30th, 2025

Halmashauri ya Wilaya ya Singida kupitia Jukwaa la Mnyama Kazi Punda, leo imefanya Maadhimisho ya siku ya mnyamakazi Punda, ikiwa na lengo la kupaza sauti ya utetezi wa wanyama hao na kuhakikisha wafugaji, watumiaji wa Punda na Jamii wanakuwa na uelewa mpana juu ya ustawi wa wanyama hao.

Hafla hiyo iliyofanyika katika kijiji cha Kinyamwenda, Kata ya Itaja, pia imehusisha maadhimisho ya miaka 3 hadi 6 ya utekelezaji wa Mradi wa Ustawi wa Mnyama Kazi Punda, ambao unatekelezwa na Shirika la Inades Formation Tanzania (IFTz), na kufadhiliwa na Brook East Africa kutoka nchini Kenya.Mradi  huu unafanya kazi na vikundi 14 vya wafugaji na watumiaji wa Punda vyenye jumla ya wanachama 240 kutoka katika vijiji vitatu katika Halmashauri, ambavyo ni Endeshi, Ghata na Kinyamwenda.

Akisoma Risala kwa Mgeni rasmi, mbele ya Wananchi na Wageni waliohudhuria, Ndg. John Mwiru ambaye ni muwakilishi wa vikundi hivyo, alisema kwa kipindi cha miaka 3 hadi 6 ya utekelezaji wa mradi, Jukwaa la Mnyama Kazi Punda limekuwa na mafanikio mengi ikiwemo; kutoa elimu ya ustawi wa mnyamakazi Punda kwa wafugaji, watumiaji wa Punda na wanajamii takribani 4,500, kupungua kwa vitendo vya ukatili walivyokuwa wakifanyiwa Punda kama kubeba mizigo bila kuweka tandiko na kufanyishwa kazi bila kujali muda wa kupumzika.

Akijibu risala hiyo, Kaimu Mkurugenzi wa Halmashauri ya Wilaya ya Singida, Bw. Christopher Kidubo alieleza namna ambavyo Halmashauri itahakikisha suala la ustawi wa mnyamakazi Punda linazingatiwa.

“ Halmashauri itahakikisha inasimamia sheria ya ustawi wa wanyama, sura 154 ya mwaka 2023 inayotambua haki za wanyama, pia Halmashauri kwa kuwatumia wataalamu wake wa mifugo na maendeleo ya jamiii tutaendeleza juhudi za matumizi bora ya yoki na matandiko ili kumuepusha Punda asipate majeraha na pia tunaahidi sisi Halmashauri kwa kushirikiana na TARI, watafanya utafiti ili tuweze kupata mbegu bora kwaajili ya malisho ya Punda” Alisema Kidubo.

Maadhimisho hayo yalipambwa kwa burudani mbalimbali kama Ngoma, Mashahiri, Maigizo na kucheza Muziki na vilevile yaliongozwa na Kauli mbiu isemayo, “Ustawi wa mnyamakazi Punda ni dhamana yetu na dhamana ya Viongozi”.