HALMASHAURI YA WILAYA YA SINGIDA YAANDAA MAFUNZO KWA WATUMISHI WAPYA

Posted on: September 3rd, 2025

Ofisi ya Mkurugenzi wa Halmashauri ya Wilaya ya Singida kupitia Idara ya Utawala na Usimamizi wa Rasilimali Watu leo imeendesha mafunzo kwa watumishi wapya wa kada mbalimbali, yakiwa na lengo la kuwaandaa katika utekelezaji wa majukumu yao ya kila siku.

Mafunzo hayo, yaliyofanyika katika ukumbi wa Shule ya Sekondari Ilongero, yalihusisha mada muhimu ikiwemo maadili ya utumishi wa umma, mapambano dhidi ya rushwa, haki na wajibu wa mtumishi wa umma pamoja na masuala ya vyama vya wafanyakazi.

Akifungua mafunzo hayo, mgeni rasmi Katibu Tawala wa Wilaya ya Singida, Bi. Naima Chondo, aliwataka washiriki kutumia mafunzo hayo kama msingi wa kutekeleza majukumu yao kwa uadilifu na uwajibikaji mkubwa.