HOSPITALI YA WILAYA YA SINGIDA YAPOKEA VIFAA TIBA.

Posted on: April 30th, 2025

Chama cha Wafanyakazi wa Serikali na Afya Tanzania(TUGHE), kikishirikiana na Taasisi ya Doris Mollel(Doris Mollel Foundation), wametoa msaada wa vifaa tiba kwaajili ya Watoto wanaozaliwa kabla ya wakati yaani  Njiti, leo Tarehe 30/4/2025 katika Hospitali ya Wilaya ya Singida.

Akikabidhi vifaa hivyo, Makamu Mwenyekiti wa Chama cha TUGHE Taifa, Dkt. Jane Madete ameshukuru uongozi wa Halmashauri kwa kuwapokea, na kutoa rai kwa wafanyakazi kuendeleza ushirikiano huu. 

“ Nichukue nafasi hii, kushukuru kwanza kwa kutupokea, tumekuja kuhamasisha na ndio ikaleta fursa hii, msingeweza kutupokea pengine hii fursa isingepatikana kwahiyo huu undugu tulioutengeneza baina ya wafanyakazi wa Halmashauri hii pamoja na sisi chama cha TUGHE uendelee. Tukitengeneza solidarity ya pamoja, tutapata matokeo mazuri na manufaa mengi zaidi, haya ni machache tu.” Alisema Dkt. Jane Madete.

Akipokea vifaa hivyo Kaimu Mkurugenzi, Ndg. Christopher Kidubo, amewashukuru TUGHE na Taasisi ya Doris Mollel kwa vifaa walivyotoa na kutoa rai kwa wadau hao kuendelea kusaidia kwa sababu uhitaji bado upo.

“ Tunawashukuru sana kwa kutuletea msaada huu, kwetu sisi hapa tulikuwa hatuna kabisa Phototherapy, Suction Pump Machine tulikuwa nazo mbili tumeongezewa tatu, lakini Oxygen Concentrator tulikuwa nazo mbili tumeongezewa moja, na tumepewa Baby Coat tano ambazo hatukuwa nazo kabisa. Lakini ndugu Katibu Mkuu na Doris Foundation, uhitaji bado upo, tunaomba kwa ridhaa yako utatusaidia tuweze kupata Patient Monitor pamoja na Room Heater.” Alisema Ndg. Kidubo.

Vifaa vilivyotolewa ni pamoja na vitanda vya kujifungulia akina Mama wajawazito, Vitanda vya kulalia watoto, mashine za kupumulia watoto, mashine za kidijitali za kupima uzito, mirija ya kupitishia maziwa ya mtoto kwenda tumboni pindi anaposhindwa kunyonya, na mashine za kuwatibia watoto wenye ugonjwa wa homa ya Manjano. Vifaa vyote hivi vimegharimu Shilingi Milioni 7,450,000/=.