KAMATI YA SIASA MKOA YAMTAKA MKANDARASI WA MAJI KIJIJI CHA MUGHUNGA KUKAMILISHA MRADI KWA WAKATI

Posted on: July 25th, 2023

Mwenyekiti wa CCM Mkoa wa Singida Mhe. Martha Mlata leo ameiongoza Kamati ya Siasa ya Mkoa wa Singida pamoja na Mbunge wa jimbo la Singida Kaskazini  Mhe. Ramadhani Ighondo na Mbunge wa Viti Maalum Mhe. Aysharose Matembe kutembelea Miradi  ya Maendeleo ndani ya Halmashauri ya Singida ambapo ameweza kufika na kujionea Mradi wa Maji Kijiji cha Mughunga, Mradi wa ukamilishaji wa Bweni Shule ya Sekondari Mughunga,Mradi wa Ushonaji wa Kikundi cha Maendeleo vijana Mgori na Ujenzi wa Shule Mpya ya Msingi Minyaa katika kata ya Kinyeto.

Akiongea baada ya kusomewa taarifa ya mradi katika mradi wa maji kijiji cha Mughunga Mhe. Mlata amemuomba Mkandarasi wa Mradi huo  Ndg Shirima(Universal Construction Ltd) kuongeza kasi ya ukamilishaji wa mradi ili kuweza kuwawezesha wananchi wa kijiji hicho kupata maji safi na salama katika muda walioahidiwa.

Akiwasilisha taarifa ya Ujenzi wa Bweni Shule ya Sekondari Mughunga ,Mkuu wa Shule ya Sekondari Mughunga Ndg Emmanuel Kitiku amesema Shule ilipokea jumla ya Shlingi milioni 30 kwa ajili ya ukamilishaji wa Bweni ambapo mradi huu ulilenga katikakuleta manufaa ya kuinua kiwango cha ufaulu wa wanafunzi hasa wanaotokea umbali mrefu,kupunguza mdondoko wa wanafunzi na utoro wa rejareja,kuondoa adha ya wanafunzi kukosa nyumba za kuishi na kuboresha mazingira ya Shule ambapo mpaka sasa wameshatumia shilingi milioni 30 kwa kazi hiyo ingawaje bado haijakamilika kwa asilimia miamoja.Akipokea taarifa hiyo Mhe. Mlata amemuagiza Mkurugenzi mtendaji kufanya tathimini ya mapungufu yaliyoko na kuyawasilisha Mkoani kwa ajili ya kuweza kupatiwa ufumbuzi ili wanafunzi waanze  kutumia bweni hilo mapema iwezekanavyo.

Kwa upande wa Mradi wa Vijana Mgori ,Msoma Taarifa Ndg Zaina Abubakari amemuomba Mhe Mwenyekiti wa CCM Mkoa kuwasaidia kupunguza deni la Mkopo uliobaki (kiasi cha shilingi laki saba) ambao Kikundi kilikopeshwa(kikundi kilichukua kiasi cha shilingi milioni mbili na laki tano)  ili kiweze kujipanua zaidi na kutoa elimu ya ushonaji kwa kinamama wengi zaidi.Kwa kuguswa na maombi hayo Mhe. Mlata amefanya harambee fupi na kufanikiwa kukusanya kiasi cha Shilingi laki mbili ambazo amekabidhi kwa kikundi hukuakiwahimiza kufanya kazi kwa bidii ili kuweza kufikia malengo waliyojiwekea.

Akihitimisha Ziara katika Mradi wa Ujenzi wa Shule Mpya ya Msingi Minyaa Mhe. Mwenyekiti wa CCM mkoa amewasisitiza Watendaji wote wa Mradi huo kuhakikisha kuwa unakamilika kwa wakati na kukabidhiwa kwa Mkuu wa Mkoa tayari kwa ufunguzi rasmi.