KAMPENI YA JIKUBALI YAZINDULIWA NA MKUU WA MKOA WA SINGIDA

Posted on: October 31st, 2023

Mkuu wa Mkoa wa Singida Mhe. Peter Serukamba leo tarehe 31/10/2023 amezindua rasmi kampeni ya Jiikubali iliyo chini ya Wizara ya Afya kupitia mpango wa Taifa wa kudhibiti Ukimwi.Hafla ya uzinduzi huo imefanyika katika Viwanja vya Bombadia ambapo ilihudhuriwa na Wanafunzi mbalimbali wa Shule za Sekondari za Wilaya ya Singida.

Akiongea na wanafunzi hao Mhe Serukamba amewaasa vijana hasa wa kike kujiepusha na tamaa kwani zinapelekea kupata vishawishi na kuangukia kwenye Janga la Ugonjwa wa Ukimwi na kushika mimba zisizotarajiwa, Amewasisitiza Wananfunzi kutumia mafunzo yatakayotolewa kwenye Kampeni hii kuongeza uelewa kwa wasichana na wavulana wa Mkoa wa Singida kwa kujitambua na kuchukua hatua za kujali maisha yao kwa manufaa yao ya  baadae. 

Akiongelea hali maambukizi ya Ukimwi kwa Mkoa wa Singida Mhe Serukamba amesema kati ya makundi mbalimbali ya jamii ni vijana wenye umri wa miaka 15 - 24  ndio ambao hawajui hali zao za maambukizi ukilinganisha na makundi mengine na kwa kulitambua hilo Serikali imeshusha umri wa kuweza kupima VVU kwa hiari kuwa ni kuanzia miaka 15. Amesema kuongezeka kwa Vituo vya kutolea huduma za upimaji wa VVU na utoaji wa ushauri nasaha ambao ni mafanikio ya Serikali ya awamu ya sita baada ya kufanikiwa kuongeza Vituo vya Afya. 

Jikubali ni kampeni maalumu kwaajili ya wanafunzi, na lengo kubwa ya Kampeni hii ni kuwajengea uwezo wa kujikinga dhidi ya maambukizi ya VVU, mimba za utotoni, kuzingatia masomo na maadili ya kitanzania na kutoa huduma za afya rafiki kwa vijana.