KATIBU TAWALA WA WILAYA YA SINGIDA, AZINDUA WIKI YA CHANJO KWA WATOTO WENYE UMRI CHINI YA MIAKA MITANO.

Posted on: April 25th, 2025

Katibu Tawala wa Wilaya ya Singida, Bi. Naima Chondo, akimuwakilisha Mkuu wa Wilaya ya Singida, amezindua wiki ya chanjo kwa watoto wenye umri chini ya miaka mitano. Uzinduzi huo, umefanyika leo tarehe 25/04/2025, katika Kituo cha Afya cha Ilongero, kilichopo katika Kata ya Ilongero na kuhudhuriwa na akina Mama walio na Watoto wachanga, pamoja na Waganga na Wauguzi wa Kituo hicho na Kamati ya Afya ya Halmashauri. 

Akitoa salamu za mgeni Rasmi, Bi. Naima Chondo amewapongeza akina Mama hao kwa kujitokeza kwa kupata watoto na pia ameishukuru serikali kwa kujali wananchi wake katika kutoa huduma bora za Afya.

“Sote tunajua, Chanjo ni bora kuliko tiba, si ndivyo?? Tunajua sana umuhimu wa Chanjo. Sisi wakati tunakua tulikuwa tunapata sana magonjwa ya Surua, Magonjwa ya Tetekuwanga na Polio, lakini Serikali yetu imejitahidi sana, kutoa chanjo kwa watoto, mpaka sasahivi haya magonjwa ya kuambukiza yanaenda yanapungua. Tumshukuru sana Rais wetu, Mama Samia kwa kuijali sana sekta ya afya, kwakutoa chanjo bure, watoto wetu wanakuwa na afya njema” Alisema Bi. Naima.

Baada ya uzinduzi akina Mama wote waliohudhuria, walipata nafasi ya watoto wao kupatiwa chanjo ya matone, ambapo zoezi hilo litaendelea mpaka tarehe 30/ 04/2025 ikiwa ndio kilele cha Maadhimisho ya Wiki ya Chanjo Duniani. Sambamba na hiyo, itatolewa pia chanjo ya Saratani ya Mlango wa Kizazi (HPV) kwa watoto wa kike wenye umri wa miaka tisa.