KIKAO CHA BARAZA MAALUM LA MADIWANI LA KUPITIA MPANGO WA BAJETI YA HALMASHAURI KWA MWAKA 2025/2026

Posted on: January 28th, 2025

Mwenyekiti wa Halmashauri ya Wilaya ya Singida,Mhe.Elia Digha ameongoza Kikao cha Baraza maalum la Madiwani la kupitia Mpango wa Bajeti ya Halmashauri kwa Mwaka 2025/2026.

Kikao hicho kilichoketi leo tarehe 28/1/2025 katika ukumbi mkubwa wa mikutano uliopo katika Ofisi za Halmashauri,kimehudhuriwa na Viongozi mbalimbali wa serikali na Kisiasa wakiwemo, Muwakilishi wa Katibu Tawala za Mikoa,Katibu Tawala wa Wilaya ambaye alimuwakilisha Mkuu wa Wilaya ya Singida,Kamati ya Usalama ya Wilaya, Mkurugenzi Mtendaji wa Halmashauri ya Wilaya ya Singida, Maafisa Tarafa, Madiwani pamoja na Wakuu wa Idara na Vitengo wa Halmashauri ya Wilaya ya Singida.

Akifungua Kikao hicho, Mwenyekiti wa Halmashauri amewasisitiza Wataalamu wa Halmashauri,suala la ukusunyaji wa mapato,hususan katika zao la vitunguu ambalo linategemewa kwa kiasi kikubwa kuleta mapato makubwa.

“ Kuwa na 55% kwa kwetu kwa kipindi hiki ni kama tumejitahidi,lakini niwaombe sana Wataalamu tusilegee kwasababu tunakuja sisi asilimia kubwa ya ukusunyaji wetu unategemea mazao ya biashara,na mazao hayo ni zao la vitunguu,na kama tunavyojua bila kufika mahali salama kwenye ukusunyaji wa mapato kwenye zao la vitunguu hatutafika salama” Alisema Mhe.Digha.

Akitoa salamu kwa niaba ya  Katibu Tawala za Mikoa, Bw. Romwald Mwendi, ambaye pia ni Afisa Mipango wa Mkoa wa Singida ameishauri Halmashauri,kuhusiana na maeneo kadhaa ya kukazia katika kuboresha ukusunyaji wa mapato,ambapo moja wapo ni kutenga na kurejesha mapato yatokanayo na kilimo,mifugo na uvuvi.

“ Maeneo machache pia ambayo nataka tuendelee kuyakazia ni pamoja na kutenga na kurejesha mapato yatokanayo na kilimo, mifugo na uvuvi,ambayo tunapata vyanzo vya mapato yetu ya ndani katika Halmashauri yetu. Hivyo, 20% inayopatikana kwenye vyanzo vya kilimo irudi kuendeleza yale maeneo ya kilimo, 15% kwenye mifugo na 5% irudi kwenye uvuvi kama tuna maeneo ya uvuvi” Alisema Bw. Romwald Mwendi.

Hatahivyo, pamoja na masuala ya Bajeti na Mapato kujadiliwa, waheshimiwa Madiwani na Wataalamu wamekumbushwa masuala mbalimbali yakiwemo kuendelea kusimamia uandikishwaji wa watoto wa Shule za awali na msingi na kuwasimamia wakulima ili wapate pembejeo za kilimo.