KIKAO CHA KAMATI YA AFYA YA MSINGI NGAZI YA WILAYA CHATOA MAAGIZO

Posted on: November 9th, 2023

Kikao cha kamati ya Afya ya msingi ya kimefanyika leo Tarehe 09/11/2023 katika Ukumbi wa Shule ya Sekondari Ilongero.Kikao hiki kimefanyika kwa dharura baada ya kuona mlipuko wa magonjwa ya kuharisha na kutapika katika baadhi ya maeneo ya Halmashauri yetu.

Kikao hiki kimehudhuriwa na Mwenyekiti wa Halmashauri, Waheshimiwa Madiwani, Mkurugenzi Mtendaji wa Halmashauri,Wakuu wa Idara na Vitengo,Watendaji wa Kata na Vijiji, Wawakilishi wa Taasisi na Wahudumu wa Afya kutoka kata zote za Halmashauri.

Akiongelea kuhusu Mlipuko wa Ugonjwa wa Kuharisha na Kutapika Kaimu Mganga mkuu wa Wilaya Dkt. Irene Shayo amesema magonjwa ya kuhara ni miongoni mwa magonjwa ya milipuko ambayo  ni hatari sana kwa uhai wa binadamu "Magonjwa hayo ni rahisi kuyapata, rahisi kuyakwepa  na rahisi pia kuua endapo hatua sitahiki zitachelewa kuchukuliwa "

Dkt Irene amesema magonjwa haya yanaambukizwa kupitia maji machafu, mboga zilizopandwa kwenye maji taka, Samaki au dagaa waliovuliwa kwenye maji machafu,vyakula na vinywajiv ilivyo na vimelea hawa kutokana na uchafu.

Baada ya utangulizi huo Mwenyekiti wa Halmashauri amewataka Wajumbe wote wa kikao hicho kuwa mabalozi wa Usafi kwenye maeneo yao na kuhakikisha kuwa taratibu zote za kukabiliana na magonjwa ya mlipuko zinafuatwa kama wataalamu wa Afya wanavyoshauri,ameagiza kuwe na ufuatiliaji kwa kila kaya ili kuhakikisha kuwa wote wanatumia vyoo bora na salama na pia

amesisitiza kuhakikisha kuwe na utaratibu wa kuchemsha maji na kuchuja kabla ya kunywa.

Akiongea kabla ya kuhitimisha kikao hicho Mkurugenzi Mtendaji amesema halmashauri imeandaa mpango mkakati wa kukabiliana na mlipuko huo kwa kuweka maelekezo yafuatayo

 (i) Kuunda kikosi kazi katika kila kijiji ili kukagua kila kaya na kubaini kaya amabazo hazina Choo bora,Watakaobainika kukosa choo bora wapigwe faini ya Shilingi elfu hamsini na kupewa muda wa kuhakikisha wanajenga choo bora.

 (ii)Kuhakikisha kila kaya, Shule, Vituo vya Afya, Masoko,Taasisi za kidini na zisizo za kiserekali,Sehemu za mkusanyiko kote kunakuwa na vyombo vya kunawia mikono,maji safi na sabuni.

 (iii)Kuchukua sampuli za maji na kutibu visima vifupi na visima virefu kwa dawa linatekelezwa na RUWASA.

  (iv) Kuhakikisha Maeneo yote ya kuuzia na kupikia chakula yanakaguliwa na kuwa safi Muda wote.

  (v)Kutoa elimu kwa Umma juu ya jinsi gani ya kuepukana na Ugonjwa wa Kuharisha na Kutapika na kuwahimiza wote wenye dalili za ugonjwa wa kuhara na kutapika kufika hospitali kwa wakati.