KIKAO CHA WAGANGA WAFAWIDHI WA ZAHANATI NA VITUO VYA AFYA.

Posted on: April 11th, 2025

Mganga Mkuu wa Wilaya ya Singida, Dk. Dorisila John, ameongoza kikao cha Waganga Wafawidhi wa vituo vya afya na zahanati zote za Halmashauri ya Wilaya ya Singida, leo tarehe 11/04/2025 katika ukumbi wa mikutano uliopo katika Hospitali ya Wilaya.

Lengo  la kikao hicho ni kujadiliana kwa pamoja masuala mbalimbali yanayohusu utoaji wa huduma za afya kwa wananchi, lakini kubwa ni kufanya tathmini kuhusu uwekezaji wa serikali katika sekta ya afya ukilinganisha na utolewaji wa huduma unavyotekelezwa na watumishi wa afya.

Pamoja na majadiliano, Dk. Dorisila amewasisitizia waganga wafawidhi, kuzingatia ubora wa utoaji wa huduma ili kuepuka kuichonganisha serikali kwa wananchi wake, hususan Mhe. Rais Dk. Samia Suluhu Hassan ambaye ndio kiongozi Mkuu wa Serikali.

“ Watumishi msiwe chanzo cha uchonganishi baina ya serikali na wananchi wake, kwasababu serikali imeshafanya jukumu lake, kwa zaidi ya  asilimia miamoja. Ukiangalia miundombinu imeboreshwa, vifaa tiba vipo vya kutosha, dawa zipo za kutosha, watumishi wanaongezwa kila wakati, mafunzo yanafanyika mara kwa mara, wizara inaleta Wataalamu wanaotoa mafunzo kwa watumishi ili kuwaongezea ujuzi, kwa hivyo hakuna sababu yoyote ya wananchi kutokupata huduma bora.” Alisema Dk. Dorisila.

Vilevile ametoa rai kwa waganga wafawidhi kuzingatia matumizi ya Ilani ya Chama cha Mapinduzi (CCM), kwani hiyo ndio Muongozo wa kuwawezesha kufanya majukumu yao kwa ufanisi kulingana na kile serikali ilichoazimia kutekeleza kwa wananchi kwa upande wa sekta ya afya. Pia amewasihi kuzingatia maelekezo yanayotolewa na Viongozi, kama vile Mkuu wa Wilaya, Mwenyekiti na  Mkurugenzi wa Halmashauri ambao mara zote wamekuwa wakisisitiza utolewaji bora wa huduma za afya kwa wananchi wa Halmashauri ya Wilaya ya Singida.