KIKAO MAALUMU CHA BARAZA LA MADIWANI CHA KUPITIA TAARIFA YA UTEKELEZAJI WA HOJA ZA CAG

Posted on: June 22nd, 2023

Mkuu wa mkoa wa Singida Mhe. Peter Joseph Serukamba amehudhuria kikao maalumu cha baraza la madiwani cha kupitia taarifa ya utekelezaji wa hoja za Mdhibiti na Mkaguzi  Mkuu wa Hesabu za Serikali CAG kwa mwaka wa fedha 2021/ 2022 kilichofanyika leo tarehe 20 Juni, 2023 katika ukumbi wa Shule ya Sekondari Ilongero iliyopo katika kata ya Ilongero  Wilaya ya Singida.

Ameipongeza Halmashauri ya Wilaya ya Singida katika kuendelea kupunguza hoja za ukaguzi kwa asilimia 50; hata hivyo amekitaka kitengo cha manunuzi ya umma cha Halmashauri  kuongeza umakini katika kuzingatia sheria, kanuni na taratibu za manunuzi ya umma pamoja na utunzaji wa nyaraka ili kuepukana na hoja zisizo za msingi.

Akiongea katika kikao cha baraza la madiwani Mhe. Serukamba ameipongeza halmashauri katika kuendelea kukabiliana na changamoto za ukusanyaji wa mapato kwani Halmashauri ya Wilaya ya Singida  kwa mwaka wa fedha 2022/ 2023 imekusanya mapato kwa 88% na hadi kufikia mwisho wa mwaka wa fedha halmashauri inatarajia kuvuka zaidi ya lengo waliojiwekea la  100%. Hata hivyo Mhe. Mkuu wa mkoa wa Singida amelishauri baraza la madiwani kubuni na kuongeza vyanzo vipya vya mapato ya halmashauri mbali na kuendelea kutegemea  vyanzo vya mapato ya mazao ya kilimo ambapo kijiografia ukanda wa Singida umekuwa ukitegemea msimu mmoja wa mvua kwa mwaka.  

Amelishauri baraza kutenga maeneo ya mabonde ili kufanya kilimo cha umwagiliaji walau misimu mitatu kwa mwaka ili  kutengeneza ajira kwa vijana na kuongeza wigo wa ukusanyaji wa mapato ya halmashauri.

Akiongelea juu ya chanzo kipya cha kukusanya mapato kupitia usafi na utunzaji mazingira hasa kwa maeneo ya halmashauri yanayoendelea  kwa kasi, Mhe. Serukamba ameishauri halmashauri ya Wilaya ya Singida kupitia baraza la madiwani kutunga sheria ndogo ndogo zitakazowabana wananchi kutotupa uchafu hovyo kwani vifaa vya kukusanyia taka (dustbin) zimewekwa kwa baadhi ya maeneo ya stendi na sokoni.

Mkuu wa mkoa wa Singida ameitaka Halmashauri ya Wilaya ya Singida kuhakikisha ifikapo Juni, 28, 2023 iwe imekamilisha majengo  ya madarasa yanayojengwa kwa mradi wa Boost. Aidha ameishukuru serikali ya awamu ya sita inayoongozwa na Mhe. Dkt. Samia Suluhu Hassan Rais wa Jamhuri ya Muungano wa Tanzania kwa kuwekeza  miradi ya maendeleo ya jamii katika mkoa wa Singida.

Aidha mwenyekiti wa Halmashauri ya Wilaya ya Singida na diwani wa kata ya Msange Mhe. Eliah Digha amemuhakikishia Mkuu wa Mkoa wa Singida Mhe. Peter Joseph Serukamba kuwa baraza limepokea maelezo na ushauri wa kiutendaji na kumuhakikishia kufanyia kazi kwa ufanisi wa hali ya juu.

Mwisho, Mhe. Mwenyekiti wa Halmashauri ya Wilaya ya Singida alimkaribisha Katibu Tawala (DAS) mpya wa Wilaya ya Singida Mhe. Goodluck Abinala Mangomango (wa kwanza kulia kwa meza kuu) kujitambulisha na kusalimia baraza.