KILELE CHA MAADHIMISHI YA UZINDUZI WA MSIMU WA KILIMO YAFANYIKA KATA YA ILONGERO

Posted on: October 31st, 2024

Kilele cha Maadhimisho ya uzinduzi wa Msimu wa Kilimo yamefanyika leo tarehe 31 Oktoba, 2024 katika kata ya Ilongero iliyopo katika Halmashauri ya Wilaya ya Singida. Katika maadhimisho hayo yaliyoanza jana huduma mbali mbali ikiwemo huduma ya kupima udongo, elimu ya juu ya mbegu na mbolea bora katika kilimo, elimu ya kilimo na ufugaji wa kisasa, elimu ya kujiajiri kupitia kilimo, uuzaji wa mbegu na mbolea kwa bei ya ruzuku na kusajili wakulima kwenye mfumo wa pembejeo na ruzuku zilitolewa kwa wakulima waliohudhuria maadhimisho hayo.

Akimuwakilisha Mkuu wa Wilaya ya Singida, Mkuu wa Idara ya Maendelo ya Jamii kutoka Halmashauri ya Wilaya ya Singida Bw. Francis Mashallo amewasisitiza wakulima kuepukana na njia za zamani za kilimo na kuhamia kwenye kilimo cha kisasa ambacho kinaweza kuwaongezea kiasi cha mavuno wanayoyapata na kuwaongezea kipato. 

"Tuondokane na kile kilimo cha mazoea cha kutumia tu mbegu zozote za kienyeji sasa hivi tunapaswa tubadilike kama tunavyojua mabadiliko ya tabia ya nchi sasa hivi ni makubwa, rutuba ya udongo kwa kiasi kikubwa imepotea kwa hiyo lazima tutumie mbolea ambazo tumeelekezwa na wataalamu wanaotuzunguka katika maeneo yetu ili tuweze kulima kilimo chenye tija"