MAADHIMISHO YA SIKU YA MTOTO WA AFRICA KWA MWAKA 2023

Posted on: June 19th, 2023

Maadhimisho ya Siku ya  Mtoto wa Africa katika Halmashauri ya Wilaya ya Singida yamefanyika tarehe 16 Juni, 2023 kwenye viwanja vya ofisi ya Mtendaji wa kata ya Mtinko wilayani Singida chini ya Kauli Mbiu isemayo “Zingatia Usalama wa Mtoto katika Ulimwengu wa Kidigitali”.

Akimuwakilisha Mkurugenzi Mtendaji wa Halmashauri ya Wilaya ya Singida Bi. Sylvia Mugasha ambaye pia ni Mkuu wa Idara ya Maendeleo ya Jamii Wilaya ya Singida amewahimiza wazazi, walezi na jamii kwa ujumla kuendelea kuwalinda watoto kwani watoto wote wana haki sawa na wanastahili kusikilizwa, kutunzwa, kuendelezwa na kuhudumiwa ipasavyo ili waweze kutimiza ndoto zao.

“Watoto wanahitaji kulindwa dhidi ya ukatili, ubakaji, ndoa katika umri mdogo, uonevu, unyanyasaji na kulindwa dhidi ya matumizi mabovu ya vifaa vya kidigitali ambavyo kimsingi hutoa maudhui yanayopelekea kuvunjika kwa maadili ya mtoto na hivyo kumuharibu kisaikolojia, watoto wanahitaji pia kuendelezwa kwa kupatiwa elimu bora kuanzia elimu ya msingi hadi elimu ya juu ”, alieleza Mugasha.

 Hata hivyo Bw. Ezekiel Mpina ambaye pia ni Afisa Maendeleo ya Jamii katika Halmashauri ya Wilaya ya Singida ameelezea jitihada zinazofanywa na Halmashauri katika kumlinda mtoto dhidi ya ukatili wa kijinsia. 

“Uongozi wa Halmashauri ya Wilaya ya Singida umekuwa ukishirikiana bega kwa bega na wadau wa maendeleo ambao ni Action-Aid, MEDO, ESTL, SAPAWA na SEMA katika kupinga na kukabiliana na vitendo vya ukatili kwa watoto kwani elimu inayotolewa ya kupinga ukatili wa kijinsia imesaidia kwa kiwango kikubwa katika kubadili mtizamo hasi na fikra potofu ili kuwalinda watoto wote dhidi ya mila na desturi zenye kuwaletea madhara ambazo hapo awali zilikuwa zikipelekea watoto kukatisha masomo”, alieleza Mpina.

Mwakilishi wa Afisa Elimu- Msingi katika Halmashauri ya Wilaya ya Singida mwalimu Antony Kibuga amewahimiza wazazi na walezi kuendelea kuchangia vyakula mashuleni ili watoto waendelee kupata chakula na hivyo kumlinda mtoto awapo katika masomo na kumuwezesha kufikia ndoto zake.

Mwakilishi wa Dawati la Jinsia kutoka Jeshi la Polisi katika Halmashauri ya Wilaya ya Singida Inspekta Saguda amewataka wazazi, walezi na wananchi wote kwa ujumla kutoa taarifa haraka ya vitendo viovu wanavyofanyiwa watoto kwa mamlaka husika ili kumlinda mtoto chini ya kauli mbiu isemayo “Zingati a usalama wa mtoto katika ulimwenguwakidigitali”.Hata hivyo Inspekta Saguda amewataka wazazi na walezi kuacha tabia ya kuwasafirisha watoto wa kike mikoani kwenda kufanya kazi za ndani; sambamba na hilo amekemea vikali tabia ya wazazi kuwaozesha watoto wa kike wakiwa na umri mdogo.