MAONESHO YA NANE NANE YATUMIWE KAMA SHAMBA DARASA KWA MAPINDUZI YA SEKTA YA KILIMO

Posted on: August 8th, 2023

Serikali imewataka wananchi kuchukulia maonesho ya Nanenane kama mashamba darasa ya kujifunza mbinu na teknolojia mpya kupitia wataalam wamifugo waliopo katika maonesho hayo pia kuichukua kama fursa ya kubadilishana uzoefu na kutangaza fursa mbalimbali za masoko na uwekezaji zilizopo katika sekta ya kilimo.

Naibu Waziri wa Kazi, in Ajira na Watu wenye walemavu, Patrobas Katambi, ameeleza hayo katika kilele cha maadhimisho ya sherehe za Nanenane kanda ya kati yaliyofanyika jijini Dodoma.

Katambi amesema, kauli mbiu ya Nanenane mwaka huu 2023 inayosema “Vijana na wanawake ni msingi imara wa mafunzo endelevu ya chakula”, imeeandaliwa mahususi baada ya kutathmini kwa kina na kubaini mchango wa vijana na wanawake katika shughuli za uzalishaji zilizochangia usalama wa chakula na kipato.

Katambi amesema mchango wa kilimo katika pato la taifa umepungua kutoka asilimia 26.8 mwaka 2021 hadi 26.2 mwaka 2022.

Naibu Waziri huyo amesema kushuka kwa silimia hizo kumetokana na changamoto za ugonjwa wa uviko 19 na mabadiliko ya tabia ya nchi yaliyojitokeza na kuathiri shughuli za uzalishaji.

Amesema serikali mbali na changamoto zinazowakabili wakulima na wafugaji inaendelea kuwajali na kuhakikisha inafanya mapinduzi makubwa na kufanya Tanzania kuwa moja ya nchi inayosifika duniani kwa usafirishaji wa mazao ya chakula, biashara na malighafi.

Katambi amesema pia,maonesho hayo yanatoa mwanya wa kuleta ufumbuzi wa matatizo mbalimbali yanayokabili uzalishaji na biashara katika mnyororo wa thamani wa sekta hizi za kilimo, mifugo na uvuvi.

Amefafanua zaidi kuwa serikali imeweka maonesho haya ya nanenane ili kutambua mchango wa wakulima wafugaji na wadau wote katika sekta hizi kutokana na mchango wake mkubwa katika pato la taifa, kupunguza umasikini pia kutoa uhakika wa upatikanaji wa chakula, “…..asilimia 80 ya watanzania wanategemea kilimo,uvuvi na ufugaji kwa ustawi wa maisha yao….” Amesema Katambi.

#Imeandikwa na Petronella Msechu