MHE. GONDWE ATEMBELEA MIRADI YA LISHE KATIKA SHULE 3 ZA SEKONDARI.

Posted on: September 29th, 2025

Mkuu wa Wilaya ya Singida, Mhe.  Godwin Gondwe ametembelea miradi ya lishe inayofadhiliwa na Shirika lisilo la kiserikali la Action Against Hunger - USA, katika shule tatu za Sekondari ambazo ni Mughamo, Itaja na Mumbii, kwa lengo la kutambulisha na kutoa shukurani kwa shirika hilo kwa kutekeleza miradi hiyo, na kuhamasisha suala la lishe mashuleni kwa kupitia ulimaji wa bustani za mbogamboga kwa njia ya mfumo wa umwagiliaji kwa matone.

Akiongozana na Katibu Tawala wa Wilaya, Bi. Naima Chondo na mwakilishi wa shirika la Action Against Hunger - USA, Bw. Hillary Makundi, pamoja na wataalamu kutoka katika ofisi ya Mkurugenzi Mtendaji wa Halmashauri ya Wilaya ya Singida,  Mhe. Gondwe amepata nafasi ya kukagua miradi hiyo pamoja na kuzungumza na wananchi waishio katika kata za Mughamo, Itaja na Msange ambako ndiko zilizopo shule hizo.

Mhe. Gondwe ameshukuru mchango wa shirika hilo, kwa kujitoa na kuunga mkono juhudi za Rais wa Jamhuri ya Muungano wa Tanzania, Mhe. Samia Suluhu Hassan katika kuhakikisha watoto wanapata lishe bora wakiwa shuleni ili kuwaimarisha kiakili na kuwasaidia  kufanya vizuri katika masomo yao. Vilevile amewasisitizia viongozi na  wananchi wa kata hizo, kuendelea kuhamasika na kuhakikisha wanafunzi wanapata chakula shuleni. Pamoja na hayo, Mhe. Gondwe ametumia nafasi hiyo kuwakumbusha wananchi kuilinda amani ya nchi na kujitokeza kwa wingi kupiga kura siku ya uchaguzi mkuu tarehe 29 Oktoba, 2025.