MHESHIWA ISSA, AMUWAKILISHA MWENYEKITI WA HALMASHAURI KATIKA KIKAKO CHA WENYEVITI WA VIJIJI

Posted on: April 9th, 2025

Diwani wa Kata ya Ilongero, Mhe Issa J. Mwiru amemuwakilisha Mwenyekiti wa Halmashauri ya Wilaya ya Singida katika  kikao cha Wenyeviti wa Vijiji vyote vilivyopo katika Halmashauri hii.Kikao hicho kimeketi leo, tarehe 9/04/2025 katika ukumbi mkubwa wa mikutano uliopo katika Ofisi za Halmashauri, ambapo hoja kubwa zilizojadiliwa ni suala la mapato, muongozo kuhusiana na matumizi ya Mihuri, kutambua na kuheshimu mipaka ya kiongozi baina ya watendaji na wenyeviti wa vijiji katika maeneo yao na masuala mengine ya kiuongozi.

Akizungumza na Viongozi hao wa vijiji kwa niaba ya Mwenyekiti wa Halmashauri, Mhe. Issa amewasisitizia viongozi hao kuhusiana na suala la bidii ya  usimamizi wa mapato, matumizi sahihi ya mihuri pamoja na kufanya kazi kwa bidii, uaminifu na kupendana.

“ Ukitaka ufanikiwe kwenye Kijiji chako, simamia vizuri mapato, hata kama ni kidogo, yasimie kwa uaminifu. Utafanya jambo dogo, watu watakuamini. Wananchi wanataka waone, wapapase, hawataki maneno, yaani hata kama una laki tano, fanya jambo la laki tano, watu waone.” Alisema Mhe. Issa.

 Akijibu hoja za viongozi hao wa Vijiji, kwa niaba ya Mkurugenzi wa Halmashauri, Mkuu wa Idara ya Utawala na Rasilimali watu, Bi. Janeth Mbugha, aliwasisitizia kuhusiana na suala la matumizi ya mihuri, ambapo alipata nafasi ya kuwasomea Muongozo maalum wa matumizi sahihi ya mihuri kwa wenyeviti wa vijiji, na vilevile alifafanua kuhusiana na ulipwaji wa posho za Mawasiliano za  kila mwezi, kuwa kila kiongozi atalipwa Shilingi 10000 ambayo ni fedha inayotoka Serikali Kuu, pia suala la malipo ya kiinua mgongo, amewaahidi kuwa litafikishwa kwenye Vikao  vya Jumuia ya Tawala za Mitaa (ALAT) Mkoa,  ili kufanyiwa maamuzi.

Pamoja na hayo, wenyeviti wa vijiji wamepata nafasi ya kuchagua viongozi kutoka miongoni mwao, kwa ngazi ya Mwenyekiti, Katibu, Mtunza fedha na wajumbe.