MKUU WA MKOA ARIDHISHWA NA UTEKELEZAJI WA MIRADI YA BOOST SINGIDA VIJIJINI

Posted on: July 18th, 2023

Mkuu wa Mkoa wa Singida Mhe.Peter Serukamba ametembelea Miradi ya Boost katika Halmashauri ya Wilaya ya Singida ambapo ameridhishwa na hali ya ukamilishaji wa miradi hasa zile shule mpya  za Minyaa na Murya.

Mkuu wa Mkoa Mheshimiwa Peter Serukamba akikagua Ujenzi wa Shule Mpya ya Msingi Murya iliyopo kata ya Ikhanoda
Mkuu wa Mkoa Mheshimiwa Peter Serukamba akikagua Ujenzi wa Shule Mpya ya Msingi Minyaa iliyopo kata ya Kinyeto

Akiongea wakati wa kuhitimisha ziara yake katika Shule mpya ya Msingi Minyaa Mheshimiwa Serukamba  ametoa pongezi kwa Mkuu wa Wilaya ya Singida Mhandisi Paskasi Muragili, Mwenyekiti wa Halmashauri ya Wilaya ya Singida Ndg Elia Digha na Mkurugenzi wa Halmashauri ya Singida  Ndg Ester Chaula kwa kazi kubwa iliyofanyika ya ujenzi wa shule mpya mbili pamoja na vyumba vya madarasa katika shule za msingi

Aidha, Mhe. Serukamba amesema Serikali ya Dkt.Samia Suluhu Hassan imejipanga vyema kuendelea kuwaletea wananchi wake maendeleo ambapo imetoa fedha nyingi za maendeleo katika sekta ya elimu,afya, na maji hivyo amewataka madiwani katika kata zote zenye miradi ya Boost kuwahamasisha wananchi kushiriki katika zoezi la usafi wa mazingira pamoja na vyumba vya madarasa katika shule hizo tayari kwa wanafunzi kuanza kutumia.

Pamoja na hayo, Mkuu wa Mkoa Serukamba ameagiza zoezi la upandaji wa miti kuzunguka shule mpya zilizojengwa kufanyika kwa ajili ya vivuli lakini pia kupendezesha mandhari ya shule hizo na kusisistiza ukamilishwaji wa vipengele vidogovidogo vilivyosalia  kabla ya jumamosi ya tarehe 22 Julai ambapo ameagiza Shule hizo zikabidhiwe kwake.