MKUU WA MKOA ATATUA KERO ZA WANANCHI WA KIJIJI CHA NDUAMUGHANGA

Posted on: November 10th, 2023

Mkuu wa Mkoa wa Singida Mhe Peter Serukamba amefanya ziara ya kukagua miradi na kusikiliza kero za Wananchi wa Halmashauri ya Wilaya ya Singida ambapo aliambatana na Mkuu wa Wilaya ya Singida Mhe Paskasi Muragili, Mwenyekiti wa Halmashauri Mhe. Elia Digha,Mkurugenzi Mtendaji wa Halmashauri,Wakuu wa Idara na wawakilishi wa RUWASA na TARURA.

Akiwa katika Kijiji Cha Nduamughanga Mhe. Serukamba ameweza kusikiliza kero za wananchi ambapo ameweza kutolea ufafanuzi wa kero ya ukosefu wa Zahanati kwa Kitongoji Cha Mukulu kwa kuwasihi Wananchi wa eneo Hilo kuwa endapo wanauhitaji wa Zahanati basi ni Bora waanzishe mkakati wa ujenzi wa boma ili baadae Serikali iangalie jinsi ya kuwasaidia kwani Sera ya Serikali kwa sasa ni kufikisha huduma ya Afya kwa kila Kijiji.Kwa swala la Barabara ya Mukulu - Nduamughanga- Mgori. ambalo liliulizwa na mkazi wa kijiji hicho Ndg Ali Shabani Mheshimiwa Mkuu wa Mkoa amewataka wakala wa Barabara Vijijini ( TARURA) kulichukua na kulifanyia kazi kwa haraka ili Wananchi hao waweze kuitumia Barabara hiyo nyakati zote.

Akijibu swali la wakazi wa Kijiji hicho Ndg Abdala Selemani na Ndg Juma Limbombo juu ya Msitu wa Mgori Mhe Serukamba amewasihi wavamizi wa msitu huo kuondoka kwenye msitu huo kwani Operesheni aliyoianzisha ya kulinda msitu huo ni endelevu na amemtaka mkuu wa Wilaya kuhakikisha kuwa wote wanaofukuzwa Msituni wanarudi walikotoka na sio kusogea kwenye Kijiji hicho na kuhatarisha usalama wa wakazi wake.

Mkuu wa Mkoa amesisitiza kuwa hatovumilia uharibifu unaofanywa na wavamizi wa Msitu huo kwani unaathiri Mkoa Mzima wa Singida kwa kupelekea upatikanaji wa mvua chache hivyo kuhatarisha usalama wa chakula kwa Wakazi wa Mkoa huu.

Naye Diwani wa Kata ya Mughunga Mhe. Mtinangi Abraham kwa niaba ya watu wa Kijiji Cha Nduamughanga amemshukuru Mkuu wa Mkoa kwa kuweza kuwatembelea na kusikiliza kero zao.Mhe Mtinangi ameishukuru Serikali ya Awamu ya sita inayoongozwa na Rais wa Jamhuri ya Muungano wa Tanzania Dkt Samia Suluhu Hassan kwa kuwajali na kuwaletea miradi mingi ya maendeleo ikiwemo mradi wa Maji na Shule(Bweni).