MKUU WA MKOA AWAPONGEZA WALIMU WA SINGIDA

Posted on: November 23rd, 2024

Mkuu wa Mkoa wa Singida, Mhe. Halima Dendego, amewapongeza walimu wa Mkoa wa Singida kwa kuonyesha weledi na uzalendo mkubwa katika kazi zao, huku akisisitiza kuwa mchango wao ni wa kipekee na umeleta faraja kwa wananchi wa Singida. Mhe. Dendego alitoa pongezi hizi katika bonanza la walimu lililoandaliwa na Ofisi ya Mkuu wa Wilaya ya Singida kwa kushirikiana na Chama cha Walimu Tanzania (CWT) Mkoa wa Singida. Bonanza hilo lililojumuisha walimu kutoka Wilaya ya Singida lilifanyika tarehe 23 Novemba, 2024, katika Viwanja vya Bombadia.

Akizungumza kama mgeni rasmi, Mhe. Dendego alisema kuwa serikali inatambua mchango mkubwa wa walimu na itaendelea kufanya jitihada za kuhakikisha kwamba kero zao zinashughulikiwa kwa haraka. Alieleza kuwa serikali itaendelea kutafuta suluhu kwa changamoto zinazowakabili walimu, ikiwa ni pamoja na kuboresha mazingira ya kazi kwa kujenga miundombinu bora kuanzia shule za awali hadi shule za sekondari na kuongeza vitendea kazi vya kutosha mashuleni.

"Waalimu wa Mkoa wa Singida mmeendelea kuwa baraka katika Mkoa huu  kwani takwimu za ufaulu katika Mkoa wa Singida zinazidi kupanda juu tofauti na ilivyokua katika siku za nyuma kwani mnafanya kazi zenu Kwa weledi na uzalendo pamoja na changamoto zilizopo ambazo zitafanyiwa kazi"alisema Mhe.Dendego