MKUU WA WILAYA AAGIZA SHULE ZOTE KUHAKIKISHA KUWA ZINA MPANGO WA KUTOA CHAKULA KWA WANAFUNZI

Posted on: July 19th, 2023

Mkuu wa wilaya ya Singida Mhandisi Paskas Muragili amewataka maafisa lishe na watendaji wa kata zote 21 katika Halmashauri ya Singida kuhakikisha Shule zote za Msingi na Sekondari zinatoa Chakula kwa wanafunzi na ziwe na Mipango ya kuzalisha Chakula kupitia Mashamba ya Shule.

Mhe. Muragili ametoa agizo hilo katika kikao cha robo ya nne cha Kamati ya lishe Halmashauri ya Wilaya ya  Singida kilichohudhuriwa na wataalamu wa Afya, watendaji wa kata, wajumbe wa kamati ya Usalama Wilaya pamoja na wakuu wa Idara na Vitengo ambao ni wajumbe katika kamati hiyo.

Amewataka watendaji hao kuhamasisha wakazi wa Maeneo yao kuchangia juhudi za Serikali kuhakikisha watoto wa Shule wanapata Lishe bora ili kumaliza kabisa tatizo la Utapiamlo kwa kuhamasisha Jamii kuchangia upatikanaji wa Mashine za kurutubisha(Fortification) chakula  kinachochangwa na wazazi ili kuongeza ubora wa chakula kinachotolewa na kuhakikisha chakula hicho kina virutubisho muhimu vya kuimarisha mwili.

Awali  Afisa Lishe wa Halmashauri ya Wilaya ya Singida Ndg.Elias Tarimo ,akitoa mada juu ya Tathimini ya Hali ya Lishe ndani ya Halmashauri kwa kipindi cha Aprili – Juni 2023 amesema “kati ya shule 129 ni shule 76 tu ndio zinazotoa lishe kwa wanafunzi na kati ya hizo hakuna shule inayotoa chakula kilichorutubishwa kwani hakuna Kata yenye mashine inayofanya urutubishaji(Fortification)”

Wakiunga mkono suala la Mashine za kurutubisha Chakula  baadhi ya watendaji wa kata wamesema kweli kuna umuhimu wa jamii  kuelimishwa kuchangia kwani gharama zitakazotumika kufuata mashine nje ya kata ni kubwa na zitakuwa endelevu tofauti na kama kila kata itakuwa na Mashine yake.